Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 358 Hüküm no: 401 Orijinal metin no: [63b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın Şeyh Mehmed Beşe b. Mehmed’den muhâlaa yoluyla boşandığı Mahmiye-i İstanbul’da Molla Hüsrev mahallesinde sâkin zâtı ma‘rifet-i şer‘iyye ile ârifân Çukadâr el-Hâc Mehmed Beşe b. Mehmed ve İbrahim b. Ahmed ta‘rîfleriyle mu‘arrefe olan Ayşe bt. Abdullah nâm hâtun meclis-i şer‘-i şerîf-i enverde zevci olup hâlâ vilâyet-i Anadolu’da Taşköprü kasabasında seferdâr olan Şeyh Mehmed Beşe b. Mehmed b. İbrahim’in karındaşı ve tarafından husûs-ı âti’l-beyâna vekîl olduğu kasaba-i mezbûre ahâlîsinden Mustafa b. Ömer ve Ali b. el-Hâc Mehmed şehâdetleriyle şer‘an sâbit olan şerbetçi Mustafa Beşe mahzarında ikrâr ve takrîr-i kelâm edip zevcim mezbûr Şeyh Mehmed Beşe zimmetinde mütekarrir ve ma‘kūdun-aleyh olan iki bin akçe mehr-i müecceli mukābelesinde beynimiz[de] ma‘lûm bir sîm kılıç ve bir münakkaş çuka dolama ve bir siyah kama alıp kabz ve kabûl ettiğimden sonra nafaka ve iddet-i ma‘lûmem ve me’ûnet-i süknâm dahi kendi üzerime olmak üzre vekîl-i mezbûr [64a] ile muhâla‘a-i sahîha-i şer‘iyye ile muhâla‘a edip ol dahi bi’l-vekâle hul‘-ı mezbûru kabûl ettikden sonra hukūk-ı zevciyyete müte‘allika âmme-i da‘vâdan ben müvekkilin zimmetini ve vekîl-i merkūm benim zimmetimi ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi [b.] Ahmed, el-Hâc Mustafa b. Tevekkül, Mehmed Çelebi b. Derviş, Ali Beşe b. Bâli.