İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 66 Hüküm no: 14 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çavuş b. Ömer’in, Mustafa Ağa b. İsmail’den aldığı esame kâğıdına karşılık ulufesini istediği Ma‘rûz Dîvân-ı hümâyûn çavuşlarından sahib-i arzuhâl Mehmed Çavuş b. Ömer meclis-i şer‘-i münîrde derûn-ı arzuhâlde mezkûru’l-ism Bezzâzistânî Mustafa Ağa b. İsmail muvâcehesinde mezbûr Mustafa Ağa bundan akdem izâle olunan Yeniçeriyân’dan on sekizinci bölüğe merbût olmak üzre cânib-i mîrîden alınacak yüz yirmi akçe ulûfesi bin dokuz yüz altmış dört guruşa bana bey‘ ve semen olmak zu‘muyla mâlımdan ol mikdâr guruşumu ahz etmişdi el-hâletü hâzihî verdiği esâmenin kâğıdları alıp meblağ-ı merkūmu bana red ve teslîme mezbûr Mustafa Ağa’ya tenbîh olunmak matlûbumdur deyü da‘vâ ettikde ol dahi cevâbında vech-i meşrûh üzre ulûfe-i mezkûreyi müdde‘î-i mezbûra bey‘ini ve semen olmak üzre ol mikdâr guruşu ahzını ikrâr ve i‘tirâf etmeğin bu sûretde ulûfe-i mezkûre atâyâ makūlesinden olup kable’l-kabz mâlik olmadığından ber-muktezâ-yı şerî‘at-i garrâ bey‘i câiz olmamağla zikrolunan esâme kâğıdlarını geri alıp semen olmak zu‘muyla makbûzu olan meblağ-ı merkūm bin dokuz yüz altmış dört guruşu alâ-mûcibi’l-ikrâr müdde‘î-i mezbûr Mehmed Çavuş’a tamamen red ve teslîme merkūm Mustafa Ağa’ya tenbîh olunduğu İstanbul Mahkemesi’nden huzûr. Fî 17 M sene [1]242