İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 66 Hüküm no: 15 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. Yusuf ile dâmadı Teberdar Ömer Ağa b. Ömer’in ev inşaatından Artin v. Sahak’a olan borçlarının taksitlendirildiği Neccâr tâifesinin perâkende kolu neferâtından sahib-i arzuhâl Çolak Artin v. Sahak nâm zimmî meclis-i şer‘-i hatîrde derûn-ı arzuhâlde mezkûru’l-ism Teberdâr Ömer Ağa b. Ömer nâm kimesne muvâcehesinde mezbûr Ömer Ağa’nın kāyınvâlidesi mu‘arrefetü’z-zat Nefise bt. Yusuf nâm hatun hâzıra olduğu hâlde ben bin iki yüz otuz dokuz senesi Zilhicceti’ş-şerîfesinin sekizinci günü hâzıra-i mezbûre Nefise Hatun’un İstanbul’da Ayasofya-i Kebîr kurbünde Üskübî İbrahim Çelebi mahallesinde vâki‘ bâ-temessük-i mütevellî bi’l-icâreteyn müstakilleten mutasarrıfe olduğu bir bâb muhterik menzil arsası üzerine dâmadı merkūm Ömer Ağa’nın bi-şartı’r-rücû‘ emriyle mâlımdan on bin dokuz yüz elli dokuz guruş sarfla müceddeden bir bâb menzil binâ ve inşâ etmemle masrûfum olan meblağ-ı mezkûrun dokuz bin beş yüz guruşunu merkūm Ömer Ağa ceste ceste mukaddemâ bana edâ ve teslîm ben dahi yedinden ahz ü kabz etmemle bâkīsi olan bin dört yüz elli dokuz guruşu mezbûr Ömer Ağa’dan bi’l-mürâca‘a hâlâ taleb ederim deyü tesâddî eylediğim da‘vâmdan bâ-tavassut-ı muslihîn merkūm Ömer Ağa ile bi’t-tav‘ ve’r-rızâ sekiz yüz guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâya ve bi’l-cümle menzil-i mezkûr husûsuna müte‘allika âmme-i da‘vâdan merkūm Ömer Ağa ile kāyınvâlidesi hâzıra-i mezbûre Nefise Hatun’un zimmetlerini onlar dahi kezâlik bi’l-cümle menzil-i mezkûr husûsuna müte‘allika âmme-i da‘vâdan benim zimmetimi her birimiz ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl etmemizle ibrâdan müstesnâ bedel-i sulh-ı mezkûr sekiz yüz guruşun iki yüz guruşunu mezbûr Ömer Ağa işbu meclis-i şer‘de bana def‘ ü teslîm ben dahi yedinden ahz ü kabz etmemle bâkīsi olan altı yüz guruşu merkūm Ömer Ağa’nın hâlen ve def‘aten edâya iktidârı olmayıp ber-vech-i âtî tecîl ve taksîte tâlib olduğunda ben dahi meblağ-ı bâkī-i mezkûr altı yüz guruşa beher şehr üçer yüz guruş verip mecmû‘unu târih-i i‘lâmdan iki ay tamamına değin tamamen bana edâ ve îfâ etmek üzre rızâmla medyûnum mezbûr Ömer Ağa’yı tecîl ve taksît eyledim deyü takrîrini merkūm Ömer Ağa ile kāyınvâlidesi hâzıra-i mezbûre Nefise Hatun’dan her biri tasdîk ve ibrâdan istisnâ kılınan bedel-i sulh-ı mezkûrdan bâkī meblağ-ı mezkûr altı yüz guruş zimmetinde müdde‘î-i mersûm Artin zimmîye sahîhan deyni olduğunu merkūm Ömer Ağa tâyi‘an ve kāt‘iyyen ikrâr ve i‘tirâf ve ecel-i mezkûru kabûl ve meblağ-ı bâkī-i mezkûr altı yüz guruşu ber-vech-i muharrer müeccelen ve mukassatan dâyin-i müdde‘î-i mesfûr Artin zimmîye tamamen edâ ve îfâya müte‘ahhid olduğu İstanbul Mahkemesi’nden huzûr. Fî 9 M sene [12]42