Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 359 Hüküm no: 402 Orijinal metin no: [64a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Marşife bt. Yorgo ile Dimitri v. Sibofil’in anlaşarak yaptıkları ev satışını fesh ettikleri Mahmiye-i İstanbul’da Mirahor mahallesinde sâkine olup zâtı Ali Çavuş b. Ahmed ve Mustafa b. Hüseyin ta‘rîfleriyle mu‘arrefe olan Marşife bt. Yorgo nâm nasrâniye meclis-i şer‘-i hatîr-i enverde Dimit[ri] v. Sibofil nâm zimmî mahzarında ikrâr ve takrîr-i kelâm edip mezbûr Dimitri’ye yedinde olan hüccet nâtıka olduğu üzre mahalle-i mezbûrede vâki‘ ma‘lûmü’l-hudûd büyût-ı adîdeyi müştemil mülk menzilimi iki yüz elli guruşa bey‘ ve teslîm ol dahi iştirâ ve tesellüm eyledikden sonra semeni olan meblağ-ı mezbûrun ancak otuz dört guruşunu alıp bâkīsini zimmetinde iken bi’t-tamâm aldım deyû kâziben ikrâr etmiş idi binâen alâ zâlik bâkī iki yüz on altı guruşu mezbûr Dimitri’den da‘vâ ve taleb eylediğimde beynimizde nizâ‘-ı küllî vâki‘ olmuşdu hâlâ bey‘-i mezkûru rızâmız ile beynimizde fesh ve ikāle edip mezbûr Dimitri menzil-i merkūmu bana teslîm ben dahi ba‘de’l-kabz makbûzum olan meblağ-ı mezbûr otuz dört guruşu yine merkūm Dimitri’ye teslîm ol dahi kabz ve tesellüm eylediğinden sonra husûs-ı mezbûra müte‘allika cemî‘ da‘vâ ve mütâlebâtdan her birimiz âharın zimmetini ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Recebi’l-ferd li sene seb‘a ve tis‘în ve elf. Şuhûdü’l-hâl: Ali Çavuş [b.] Ahmed, Mustafa b. Hüseyin, el-Hâc Mustafa b. Tevekkül, Parsih v. Yasef, Pilaş v. Yorgi.