İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 76 Hüküm no: 27 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstefan v. Hristo ile Ömer b. Süleyman’ın ortak oldukları yoğurtçu gediğine sıra ile tasarruf edecekleri Ma‘rûz Yoğurtçu İstefan v. Hristo zimmî meclis-i şer‘-i münîrde Ömer b. Süleyman muvâcehesinde İstanbul’da Aksaray kurbünde Kızıl Musluk nâm mahâlde vaki‘ ma‘lûmü’l-hudûd bir bâb yoğurtçu kârhânesi derûnunda mevcûde beyne’l-hiref gedik ta‘bîr olunan âlât-ı lâzıme-i ma‘lûmenin nısf-ı şâyi‘-i benim ve nısf-ı şâyi‘-i âharı merkūm Ömer’in iştirâken ve şâyi‘an yedimizde mâlımız olup lâkin merkūm Ömer birkaç seneden beri kârhâne-i mezbûrede sâkin olup gedik-i mezkûru müstakillen isti‘mâl eylediğinden ben hissemle intifâ‘ edemememle gedik-i mezkûr beynimizde zamânen mühâyâten olunmak matlûbumdur deyü da‘vâ [ve] merkūm Ömer dahi husûs-ı mezkûru tasdîk ve mühâyâten râzı olup ancak evveliyet ve sâneviyetde ihtilâf ve nizâ‘ eylediklerine mebnî tatayyüben [tatyîben] li’l-kulûb kur‘a-i şer‘iyye ilkā olundukda müdde‘î-i mersûm evvel vâki‘ olmağın gedik-i mezkûru târih-i i‘lâmdan bir sene evvel müdde‘î-i mersûm İstefan zimmî ba‘dehû kezâlik bir sene merkūm Ömer zabt ü isti‘mâl etmek üzre zamânen akd-i mühâyât eyledikleri İstanbul Mahkemesi’nden huzûr. Fî 26 M sene [1]242