Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 359 Hüküm no: 403 Orijinal metin no: [64a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kolo v. Marti’nin Hızır Beşe b. Sinan’dan sattığı eşyadan dolayı alacaklı olduğu Mahmiye-i İstanbul’da vâki‘ Kırkçeşme sakalarından işbu bâ‘isü’l-vesîka Kolo v. Marti nâm zimmî meclis-i şer‘-i şerîf-i [enverde] saka Hızır Beşe b. Sinan mahzarında üzerine da‘vâ ve takrîr-i kelâm edip târih-i kitâbdan bir sene mukaddem mezbûr Hızır Beşe’ye bey‘ ve teslîm ol dahi yedinden iştirâ ve kabz eylediği bir re’s bârgir ve bir çift kösele meşk ve kova bahâsından zimmetinde dokuz bin altı yüz akçe hakkım olup meblağ-ı mezbûrun bundan esbak yine? beş bin üç yüz kırk akçesini ahz u kabz edip dört bin iki yüz altmış akçesi zimmetinde bâkī kalmağla hâlâ mezbûr Hızır Beşe’ye suâl olunup meblağ-ı bâkī-i mezbûrun alıverilmesi matlûbumdur dedikde gıbbe’s-suâl mezbûr Hızır Beşe cevâbında kaziyye minvâl-i muharrer üzre olup zikr olunan bârgir ve meşk ve kova semenlerinden bâkī zimmetinde vâcibü’l-edâ dört bin iki yüz altmış akçe müdde‘î-i mezbûra deyni olduğunu ikrâr ve i‘tirâf etmeğin mûcebince meblağ-ı mezbûr dört bin iki yüz altmış akçeyi müdde‘î-i mezbûra edâya tenbîh oluna mâ hüve’l-vâki‘ bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Sakabaşı Ali b. Abdullah, Mustafa [b.] Abdullah, Ahmed b. Mustafa, Hüseyin b. Mahmud.