İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 84 Hüküm no: 35 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahvehane zannıyla kapatılan berber dükkânın tekrar açılmasına izin talebi Seddü bend olan dükkânın berber dükkânı olduğu ba‘de’l-ihbâr küşâdı Ma‘rûz Sâdır olan fermân-ı âlîlerine imtisâlen işbu arzuhâlde istid‘â olunan husûsun keyfiyeti etrâfıyla istiknâh ve tahkīk için sahibe-i arzuhâl Zeliha Hatun câriyeleri ve Âsitâne-i aliyyede vâki‘ berber esnâfının kethudâsı İbrahim Ağa ve şeyhi Musa Efendi ve du‘âcısı İsmail Efendi ve yiğitbaşısı es-Seyyid Mehmed Nuri Usta ve çavuşu Mustafa Usta ve sâir vukūf-ı tâmları olan nizâm ustaları nezd-i dâ‘iyâneme celb ile suâl olundukda bundan akdemce Âsitâne-i aliyye ve tevâbi‘inde vâki‘ mukayyed berber dükkânları ibkā ve kahvehâneler bâ-fermân-ı cihân-mutâ‘ sedd ü bend olunduğu esnâda sahibe-i arzuhâl-i mezbûrenin hâmiş-i arzuhâlde mastûr derkenâr nâtık olduğu üzre Başmuhâsebe’de Hüseyin Usta ismine mukayyed ve taht-ı nizâma dâhil ve mu‘teber olarak İstanbul’da Ebulfeth Sultân Mehmed Hân-subbet? aleyhi siccâli’r-rahmetü ve’l-gufrân- Hazretleri Câmi‘-i şerîfi nezdinde haffâfhâne içinde vâki‘ gediğine mâlike olup âhara îcâr ile ta‘ayyüş edegeldiği bir bâb kadîm berber dükkânı dahi hîn-i tahrîrde sehve mebnî kahvehâne zannıyla sedd ü bend ve ocağı hedm olunmuş ve ol vechile medâr-ı ma‘âşından dûr ve mahrûm kalmış olduğundan bahisle dükkân-ı mezkûrun kaydı mûcibince kemâ-kân berber dükkânı olmak üzre küşâdına izin ve ruhsat-ı seniyyeleri erzânî buyurulmasını niyâz ve istirhâm ve fi’l-vâki‘ dükkân-ı mezkûr mukayyed ve mu‘teber kadîm berber dükkânı olup seddi husûsu sehve mebnî olduğunu kethudâ ve nizâm ustaları hâzırûn-ı merkūmûndan her biri inhâ ve ihbâr eyledikleri ma‘lûm-ı ilm-i âlem-ârâ-yı rahîmâneleri buyruldukda dükkân-ı mezkûr fi’l-hakīka kadîm berber dükkânı olup sehve mebnî seddolunmuş olduğuna ve kadîm berber dükkânları hakkında emr ve irâde-i âlem-mutâ‘ sünûh etmiş olmadığına nazaran dükkân-ı mezkûrun kaydı mûcibince kemâ-kân berber dükkânı olmak üzre küşâdına izin ve ruhsat-ı seniyyeleri erzânî buyurulmak muvâfık-ı re’y-i rezîn-i isâbet-karîn-i düstûrâneleri olur ise ol bâbda fermân-ı vâcibü’l-ittibâ‘ları sudûru iktizâ eylediği İstanbul Mahkemesi’nden huzûr. Fî 5 min-S sene 1242