İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 85 Hüküm no: 37 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu esnafının, nâzırları Mehmed Ağa’dan şikâyetlerinin yersiz olduğu Sabun Nâzırı Mehmed Ağa’nın hüsn-i hâli zımnında Ma‘rûz Sabuncu esnâfından ba‘zıları hâlâ Sabun Nâzırı Tiryâkioğlu Mehmed Ağa kullarından şikâyeti hâvî huzûr-ı sâti‘u’n-nûr-ı âsafânelerine arzuhâl takdîm eylediklerine binâen sünûh eden irâde-i isâbet-âde-i müşîrâneleri mûcibince tarafeyn hayme-i hazret-i kethudâ-yı sadâret-penâhîlerine celb ile istiknâh olundukda netîce-i merâmları garazdan ibâret idüğü tahakkuk etmiş ve nâzır-ı merkūm kullarının bu âna kadar hilâf-ı rızâ bir hareketi mesmû‘ <> olmamış olduğundan bi’l-istîzân re’y-i rezîn-i sâmîleri üzre cevâb verilmiş ise de sabun maslahatı havâyic-i mukteziyeden olmağla bundan böyle nâzır-ı merkūmun icrâ-yı levâzım-ı sadâkat ve cümle ile hüsn-i mu‘âşeret ve her hâlde rızâ-cûyâne harekete nasb-ı nefs-i ihtimâm ve gayret eylemesi vâcibe-i zimmet idüğü ve ma‘azallâhu te‘âlâ ser-mû hilâf-ı rızâ hareketi vukū‘a gelir ise mazhar-ı i‘tâb-ı azîm olacağı gûş-ı intibâhına gereği gibi tefhîm olunduğu İstanbul Mahkemesi’nden huzûr. Fî 17 M sene 1242