İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 85 Hüküm no: 38 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Artin’in, Kigork v. Markar ve ortağı Hadros v. Oseb ile iki bin guruşa sulh olduğu 2000 guruşa sulh Ma‘rûz Kereste tüccârından sahib-i arzuhâl Agop zimmî kendi nefsinden asâleten ve babası Karabet v. Artin zimmî tarafından husûs-ı âtîde vekîl olduğu Avakim v. Karabet ve Parseh v. Avakim zimmîler şehâdetleriyle sâbit olmağla vekâleten meclis-i şer‘-i münîrde derûn-ı arzuhâlde isimleri mastûr Keresteci Kigork v. Markar ve şerîki Hazer v. Oseb nâm zimmîler muvâcehelerinde mersûmân Kigork ve Hazer zimmîler zimmetlerinde benimle babam mersûmun mâlımızdan ve yedimizden iştirâ ve kabz eyledikleri bâ-defter-i müfredât ecnâs-ı kereste semeninden ba‘de külli’l-hesâb gayri ez-teslîmât sahha’l-bâkī beş bin iki yüz guruş alacak hakkımız olmağla bi’l-asâle ve bi’l-vekâle hâlâ taleb ederim deyü tesâddî eylediğim da‘vâmdan bâ-tavassut-ı muslihîn mesfûrân ile bi’t-tav‘ ve’r-rızâ an-inkâr iki bin guruş bedel-i medfû‘ ve makbûza bi’l-asâle ve bi’l-vekâle sulh olduğumda onlar dahi sahh-ı mezkûru kabûl etmeleriyle ziyâdesine ve bi’l-cümle husûs-ı mezkûra ve sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle ve bi’l-vekâle kabûlü hâvî ibrâ ve ıskāt eyledik deyü ikrâr ve tesâdukları İstanbul Mahkemesi’nden huzûr. Fî 16 M sene 1242