İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 86 Hüküm no: 39 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erini bt. Takar’ın, mutasarrıfı olduğu bozahaneden Dumni bt. Nikola ve ortaklarını çıkardığı Bozahâne gediği nizâ‘ı men‘i Sahibe-i arzuhâl şahsı mu‘arrefe Dumni bt. Nikola nâm Nasrâniye meclis-i şer‘-i münîrde derûn-ı arzuhâlde mezkûreti’l-ism kezâlik mu‘arrefetü’ş-şahs Erini bt. Lefter Nasrâniye muvâcehesinde İstanbul’da Langa kurbünde İnebey mahallesinde mersûme Erini Nasrâniyenin menzili tahtında kâin bir bâb vakıf bozahâne Nasrâniye-i mesfûre ile li-ebeveyn er karındaşı Hristaki zimmînin bâ-temessük-i mütevellî bi’l-icâreteyn nısfiyet üzre taht-ı tasarruflarında ve gediğinin dahi yüz yirmi sehm i‘tibâriyle elli sehmi benim mâ‘adâsı dahi müştereklerim gāibûn ani’l-meclis Vasil ve Hristo ve Yorgo ve Yorgi ve Metro ve İsteryo nâm zimmîlerin iken mesfûre Erini Nasrâniye bundan akdem karındaşı mersûm Hristaki zimmî ile ma‘an fesh-i akd-i icâre-birle beni ve müştereklerim gāibûn-ı mersûmunu bozahâne-i merkūmeden ihrâc etmeleriyle suâl olunup bozahâne-i mezkûreyi gediğimiz olmak üzere kadîm kirâsıyla yine bize îcâra mersûme Erini Nasrâniyeye cebr olunmak murâdımdır deyü tesâddî eylediği da‘vâsı meşrû‘a olmadığından mâ‘adâ istikşâf-ı hâl için mersûme Erini Nasrâniye istintâk olundukda cevâbında işbu yedimde olup bin iki yüz kırk bir senesi Cumâdelulâsının yirmi yedinci günü târihiyle müverrah ve ol târihde Rumeli kazaskeri bulunan es-Seyyid Mehmed Sıddık Efendi merhûmun hatmiyle mahtûm bir kıt‘a i‘lâm-ı şer‘îde tafsîl ve beyân olunduğu üzre târih-i mezkûrda mübârek rikâb-ı kamer-tâb-ı husrevânîye takdîm eylediğim arzuhâlim hâmişine sâdır olan fermân-ı âlî-şâna imtisâlen kazasker-i müşârün-ileyhin Cum‘a günü Arz Odası’nda huzûr-ı hazret-i sadâret-penâhîde akd eylediği meclis-i şer‘-i enverde müdde‘iyye-i mesfûre Dumni Nasrâniye ve müşterekleri mesfûrûn ile bi’l-muvâcehe lede’l-mürâfa‘a bozahâne-i mezkûrenin gedik kaydı bâ-fermân-ı âlî suâl olundukda o makūle gedik kaydı bulunmadığı Başmuhâsebe ve Haremeyn muhâsebesi ve ma‘den mukāta‘ası ve hâslar mukāta‘ası ve baş mukāta‘a ve İstanbul ve Bursa mukāta‘ası ve Anadolu muhâsebesi ve küçük evkāf muhâsebesi ve mevkūfât ve piyâde mukābelesi ve süvâri mukābelesi kalemlerinden derkenâr olunmağla bu makūle mukayyed olmayan gedikler şer‘an ve kānûnen mu‘teber olmadığını kazasker-i müşârün-ileyh hazretleri mesfûre Dumni Nasrâniye ile müşterekleri mesfûrûna tefhîm ve bozahâne-i mezkûreyi tahliye ve benimle karındaşım mesfûra teslîme tenbîh eylediğini huzûr-ı âlîye i‘lâm etmekle bâlâsına işbu i‘lâm-ı şer‘î huzûr-ı lâmi‘u’n-nûr-ı mülûkâneye lede’l-arz manzûr-ı me‘âlî-i mevfûr-ı hazret-i pâdişâhî olmuş ve şer‘le rü’yet ve i‘lâm olunup bitmiş olmağla mûcibince amel olunmak bâbında musahhah fermân-ı âlî-şân şeref-bahş-ı sahîfe-i sudûr olmuş olmağın ber-mûcib-i i‘lâm-ı şer‘î ve ber-mantûk-ı fermân-ı âlî bozahâne-i mezkûreden mesfûrûnu ihrâc ile zabt ve tasarruf etmişdim deyü ibrâz eylediği i‘lâm-ı şer‘î ve emr-i âlînin mazmûnlarını müdde‘iyye-i mesfûre Dumni Nasrâniye ikrâr ve i‘tirâf etmeğin bu sûretde bozahâne-i mezkûreye şer‘an ve kānûnen bir vechile müdâhaleye kādir olmadığı mesfûre Dumni Nasrâniyeye tefhîm ve bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 7 S sene 1242 [Beyaz Beyaz]