İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 87 Hüküm no: 40 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahvehane zannıyla kapatılan berber dükkânının yeniden açılması izin talebi Seddü bend olunan dükkân berber dükkânı olduğu ba‘de’l-ihbâr küşâdı’çün istid‘â Ma‘rûz Sâdır olan fermân-ı âlîlerine imtisâlen istid‘â ve derkenâra nazaran sahibe-i arzuhâl Hüseyin ve Ebîbekir’in vekîlleri meclis-i şer‘a celb ile vech-i iddi‘âları suâl olundukda bi’l-muvâcehe muktezâ-yı şer‘-i kavîm üzre görülecek husûs ve hasmları olmayıp ancak ber-mantûk-ı derkenâr İstanbul’da Ayazma Değirmenciler içinde köşe başında vâki‘ Başmuhâsebe’de Ali Usta ismine mukayyed ve taht-ı nizâma dâhil olarak bi’l-iştirâk gediğine mâlikleri oldukları bir bâb berber dükkânı isminde ve saklıca olduğundan bundan akdemce mecmû‘-ı kahvehânelerin def‘i bâbında celâdet-rîz-i sudûr olan fermân-ı âlem-mutâ‘ mûcibince dükkân-ı mezkûr dahi me’mûrîn ma‘rifetleriyle sedd ü bend ve ocağı hedm olunmuş olduğu ve düyûn-ı kesîreye giriftâr olup medâr-ı ma‘âşları dahi dükkân-ı mezkûr hâsılâtına münhasır olduğundan ez-her cihet su‘ûbet ve ızdırâba dûçâr oldukları beyânıyla fîmâ-ba‘d kahvehâne şeklinden kurtularak mahâll-i sû’ olmayan berber dükkânı heyetine ifrâğ ve kaydı mûcibince berber dükkânı olarak isti‘mâl olunmak şartıyla küşâdına müsâ‘ade-i merâhim-âde-i seniyyeleri erzânî buyurulmasını istirhâm ve istid‘â ve fi’l-vâki‘ hâmiş-i arzuhâlde kaydı derkenâr olunan Berber Ali Usta dükkânı işbu dükkân olup kadîm berber dükkânı olduğunu ve ber-vech-i ta‘ahhüd kahvehâne tarzından çıkarılarak emsâli misillü âdet üzre berber dükkânı şekline ifrâğ olunduğu sûretde bir gûne beis ve mahzûr dahi kalmayacağını Âsitâne-i aliyyede vâki‘ berber esnâfının kethudâsı İbrahim Ağa ve şeyhi Musa Efendi ve du‘âcısı İsmail Efendi ve yiğitbaşısı es-Seyyid Mehmed Nuri Ağa ve çavuşu Mustafa Ağa ve sâir nizâm ustaları dahi ihbâr ve inhâ eyledikleri ma‘lûm-ı ilm-i âlem-şumûlleri buyruldukda hâllerine merhameten istid‘âlarına müsâ‘ade-i aliyyeleri erzân buyurulmak re’y-i rezîn-i isâbet-rehin-i âsafânelerine menût idüğü İstanbul Mahkemesi’nden huzûr. Fî 7 Safer sene [1]242