İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 88 Hüküm no: 41 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi b. İsmail’in, enfiye kitâbetini devrinden pişman olduğu, Süleyman Efendi . Abdurrahman ile 200 guruşa sulh oldukları Enfiye kitâbeti nizâ‘ından teberru‘an 200 [guruş] teslîm ile ibrâ Sahib-i arzuhâl Hüseyin Efendi b. İsmail Efendi meclis-i şer‘-i münîrde derûn-ı arzuhâlde ismi mezkûr Keşânîzâde es-Seyyid Ahmed Ağa b. es-Seyyid Mehmed muvâcehesinde hâmiş-i arzuhâ<>le ihrâc olunan kayd nâtık olduğu üzre İstanbul ve tevâbi‘i enfiye mukāta‘asının bâ-berât-ı âlî-şân mutasarrıf olduğum kitâbeti bin iki yüz otuz sekiz senesi Cumâdelûlâsı’nda beş bin guruş bedel-i makbûz ile mukābelesinde enfiye emîni inhâsıyla benim bâ-hüsn-i ferâğ ve kasr-ı yedimden merkūm es-Seyyid Ahmed Ağa’ya tevcîh ve uhdesine berat olundukdan sonra merkūm Ahmed Ağa dahi yine meblağ-ı merkūm mikdârı bedel ile dokuz mâh mürûrunda gāib ani’l-meclis Süleyman Efendi b. Abdurrahman’a ferâğ edip kitâbet-i mezkûre el-yevm bâ-berât-ı âlî-şân merkūm Süleyman Efendi’nin uhdesinde iken ben ba‘zı kimesnelerin iğfâl ve tahrîkleriyle ferâğ-ı mezkûrda aldandım deyü tesâddî eylediğim da‘vâ-yı mezkûrem meşrû‘a olmadığı ba‘de’t-tefhîm mezbûr es-Seyyid Ahmed Ağa fakr-ı hâlime merhameten iki yüz guruş mâlından teberru‘an meclis-i şer‘de bana def‘ ü teslîm ve umûruma sarfla istihlâke emreylediğinde ben dahi ahz ü kabz ve umûruma sarfla istihlâk etmemle fîmâ-ba‘d kitâbet-i mezkûrede benim asla alâka<> ve medhalim ve da‘vâ ve nizâ‘ ve husûmetim kalmayıp bi’l-cümle hukūk-ı şer‘iyyeye müte‘allika âmme-i da‘vâdan mezbûr es-Seyyid Ahmed Ağa’nın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt eyledim deyü ikrâr ve tasdîkleri İstanbul Mahkemesi’nden huzûr. Fî 11 Safer sene [1]242