.:: İstanbul Kadı Sicilleri ::.


İstanbul Mahkemesi 148 Numaralı Sicil (H. 1241-1242 / M. 1826-1827)
cilt: 90, sayfa: 89
Hüküm no: 42
Orijinal metin no: [8b-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Kartal kasabasında bazı ekmekçilerin, Uncu Filibos v. Kukas ile niza’a düştükleri ve 8500 guruşa sulh oldukları

8500 guruşa sulh

Ma‘rûz

Medîne-i Üsküdar’a muzâfe Kartal kasabası ekmekçileri Yorgi v. Yani ve Dimitri v. Yorgi ve Kiryako ve Petro veledey Hristo zimmîler evvelen Çarşamba günü Arz Odası’nda huzûr-ı lâmi‘u’n-nûr-ı düstûrânelerinde ve ba‘dehû şifâhen sâdır olan fermân-ı âlem-mutâ‘larına imtisâlen dâ‘îhânelerinde ma‘kūd meclis-i şer‘-i münîrde kasaba-i mezbûre uncusu derûn-ı arzuhâlde mezkûru’l-ism Filibos v. Kukas zimmî muvâcehesinde şerîki Vartan v. Manuk zimmî ile habbâzân kethudâsı ve nizâm ustaları ve sâir iktizâ edenler hazır olduğu hâlde zikrolunan Kartal kasabası Dersa‘âdet’e akreb olmak cihetiyle ahâlîsinin zarûretden vikāye için Kapan-ı dakīkden narh üzre uncusuna buğday verilip uncu dahi ba‘de’t-tahn kezâlik narh üzre ekmekçiye bey‘ ve ekmekçi dahi Âsitâne-i aliyye narhı üzre nân-ı azîz i‘mâl ve tabh ve ibâdullâha bey‘ etmek kadîmden beri bâ-fermân-ı âlî mer‘î ve mu‘teber şurût-ı nizâmımızdan olduğuna binâen bin iki yüz kırk senesi Rebî‘ülevveli’nin on beşinci gününden kırk bir senesi Şa‘bânının on birinci gününe gelince dakīkin beher vakıyyesinin narhı onar paraya olduğu hâlde semen-i mezkûr ile mersûm Filibos zimmîden iştirâ ve kabz ve iki paralığı narh üzre seksener dirhem olarak nân-ı azîz i‘mâl ve ibâdullâha bey‘ eylediğimiz beherinin derûnlarında sâfî mevzû‘u altmışar vakıyye olarak cem‘an beş bin yüz çuval dakīkin vech-i meşrûh üzre beher vakıyyesi onar paradan cem‘an esmânı olan yetmiş altı bin beş yüz guruşdan bu âna kadar ceste ceste teslîmâtımız olan yetmiş beş bin iki yüz seksen bir guruş fürû-nihâde ve tenzîl olundukda sahhu’l-bâkī bin iki yüz on dokuz guruş deynimiz kalmak iktizâ eder iken mersûm Filibos zimmî hâmiş-i arzuhâlde mastûr derkenâr nâtık olduğu üzre ziyâde alacağım vardır deyü müddet-i vâfire bizi zindâna haps ettirdiğinden mâ‘adâ kasaba-i mezbûrede kâin on bin guruş kıymetli iki kıt‘a habbâz fırınlarımızı zabt ve on dört bin iki yüz yetmiş bir guruş mikdârı zimem-i nâsda olan alacaklarımızı dahi bunlar bana gelecekdir deyü müdâhale etmekle suâl olunup bâkī deynimiz olan meblağ-ı mezkûru yedimizden ahz ile zikrolunan fırınları bize redd ü teslîme ve zimemât-ı mezkûreden dahi keff-i yedine ve fîmâ-ba‘d dahi ber-mûcib-i şurût-ı nizâm ve ber-muktezâ-yı fermân-ı âlî amel ve harekete mersûm Filibos zimmîye tenbîh olunmak matlûbumuzdur deyü da‘vâ eylediğimizde ol dahi cevâbında kazıyye minvâl-i muharrer üzre olduğunu ikrâr ve i‘tirâf edip ancak benim sizinle dakīkin beher vakıyyesini on ikişer paraya pazar ve mukāvelemiz olmağla binâen-aleyh zimmetinizde on beş bin üç yüz guruş ziyâde alacağım olduğundan tahsîli’çün haps ettirip [9a] zikrolunan fırınlar dahi mu‘attal kalmamak için şurût-ı nizâm ve âdet-i kadîmemiz üzre cemî‘ fâide-i hâsılası tarafınıza âid olmak şartıyla emâneten zabt ve idâre ve zimemât-ı mezkûreyi dahi alacağıma mahsûben tahsîl etmek üzre müdâhale etmişdim deyip ol vechile beynimizde ba‘de’l-münâza‘a kethudâ ve nizâm ustaları merkūmûn tavassutlarıyla beynimiz ıslâh olunup mersûm Filibos zimmî da‘vâ-yı mezkûresinden bizimle sekiz bin beş yüz guruşa sulh olduğunda biz dahi sulh-ı mezkûru kabûl etmemizle bedel-i sulh-ı mezkûrundan ve zimemât ve fâide-i mezkûreden mâ‘adâ ziyâdesine ve bi’l-cümle husûs-ı mezkûra ve sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü takrîrlerini mersûm Filibos zimmî tasdîk etmeğin bu sûretde bedel-i sulh-ı mezkûr sekiz bin beş yüz guruşu mersûm Filibos zimmîye edâ ve teslîme mesfûrûna ve fırın-ı mezkûrların bey‘-i vefâ ve rehniyet misillü deyn-i mezkûra bir vechile ta‘alluku olmayıp zimemât-ı mezkûrede dahi bir gûne alâkası olmadığından hâlâ fırın-ı mezkûrları mâlikleri mesfûra [mesfûrûna] teslîme ve zimemât-ı mezkûreden dahi bi-tamamihâ keff-i yedine ve fîmâ-ba‘d dahi ber-mûcib-i nizâm-ı kadîm ve ber-muktezâ-yı emr-i âlî amel ve harekete mesfûr Filibos zimmîye tenbîh olunduğu İstanbul Mahkemesi’nden huzûr.

Fî 11 min-S sene 1242

Mukābele-şüd