İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 90 Hüküm no: 43 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Yazıcı’nın, Mustafa Reis ile ortak olduğu gemiyi batırması ve bedelini edaya taahhüdü 1250 guruş rubu‘ sefîne kıymeti hükmü Ma‘rûz Sahib-i arzuhâl Trabzonî es-Seyyid Mustafa Reis b. es-Seyyid Ali nâm kimesne meclis-i şer‘-i münîrde Odunkapısı tüccârından derûn-ı arzuhâlde mezkûru’l-ism Ahmed Yazıcı b. Ebîbekir nâm kimesne muvâcehesinde bin iki yüz otuz dokuz senesi hilâlinde Kapan-ı dakīk iskelesinde merbût beş bin guruş kıymetli martiko ta‘bîr olunur kalyon kıçlı bir kıt‘a sefînenin rub‘u benim ve selâse-i erbâ‘ı mezbûr Ahmed Yazıcı’nın iştirâken yedimizde mülkümüz iken mezbûr Ahmed Yazıcı ol târihde sefîne-i mezkûreye izin ve icâzetim ve haber ve âgâhım olmaksızın râkib olup <<İbrahim>> İbrail İskelesine götürür iken esnâ-yı râhda Süzebolu İskelesi pîşgâhında fırtına zuhûr ve sefîne-i mezkûre bi-kazâillâhi te‘âlâ gark olup ol vechile ber-mûcib-i fetvâ-yı şerîfe mezbûr Ahmed Yazıcı te‘addî etmekle sefîne-i merkūmenin târih-i mezkûrda kıymet-i mezkûresi olan beş bin guruşdan benim rubu‘ hisseme isâbet eden bin iki yüz elli guruşu mezbûr Ahmed Yazıcı’dan zamânen taleb ederim deyü da‘vâ ettikde ol dahi cevâbında ancak bin guruş kıymetli sefîne-i mezkûre ber-vech-i muharrer iştirâken mâlikleri olduğunu ve mahâll-i mezkûrda garkını ikrâr lâkin müşterekim müdde‘î-i mezbûr es-Seyyid Mustafa Reis’in izniyle sefîne-i merkūmeye râkib olup iskele-i mezbûreye zahîre tahmîli’çün imrâr etmişdim deyü müdde‘î-i merkūm es-Seyyid Mustafa Reis’in inkârına mukārin eylediği izin ve icâzet müdde‘âsını isbât için bi’d-defe‘ât meclis-i şer‘a ikāme eylediği kimesneler edâ-i şehâdet-i şer‘iyye edemeyip şâhid-i âhar ikāmesine havâle olundukda kirâren ve mirâren müddet-i mehl-i şer‘î tamam ve tahlîfe dahi tâlib olmamağla bu sûretde mezbûr Ahmed Yazıcı’nın kavl-i mücerrediyle nesne sâbit olmayıp da‘vâ-yı mezkûresiyle müdde‘î-i mezbûr es-Seyyid Mustafa Reis’e bilâ-beyyine mu‘ârazadan ba‘de’l-men‘ merkūm es-Seyyid Mustafa Reis ziyâde dört bin guruş kıymet müdde‘âsını kıbel-i şer‘den me’zûnen irsâl olunan Kâtib Mehmed Hidâyetullâh Efendi dâ‘îlerinin Kapan-ı dakīk nâibi efendi dâ‘îlerine mahsûs odada huzûr-ı Müslimînde akd eylediği meclis-i şer‘de her biri adl ve makbûlü’ş-şehâde idükleri ihbâr olunan reisler kethudâsı el-Hâc Veliyüddin Ağa b. Ali ve kapan tüccârlarından el-Hâc İsmail Ağa b. el-Hâc Ali ve el-Hâc Mehmed Ârif Ağa b. el-Hâc İsmail ve el-Hâc Musa Ağa b. el-Hâc İsmail ve İbrahim Ağa b. el-Hâc Mehmed Emin ve Bayram Ağa b. Hasan nâm kimesneler şehâdetleriyle bi’l-muvâcehe vech-i şer‘î üzre isbât eylediğini kâtib-i merkūm dâ‘îleri mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip tarafeyn hazır oldukları hâlde alâ-vukū‘ihî inhâ ve takrîr edip onlar dahi ba‘de’t-tasdîk mûcibiyle sefîne-i mezkûrenin kıymet-i müsbetesi olan meblağ-ı mezkûr beş bin guruşun rub‘u olan bin iki yüz elli guruşunu müdde‘î-i merkūm es-Seyyid Mustafa Reis’e zamânen edâ ve teslîme mezbûr Ahmed Yazıcı’ya tenbîh olunduğu İstanbul Mahkemesi’nden huzûr. Fî-gurreti S sene 1242