Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 360 Hüküm no: 404 Orijinal metin no: [64a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yenisaray Çamaşırcılar Odası Vakfı hesabının yeni mütevelliye teslim edildiği Saray-ı cedîd-i sultânî -dâme mahfûfen bi’l-avni’s-Samedânî-’de câmeşûy odası ahâlîsinin mühimmâtına mevkūfe nukū[da] hâlâ mütevellî olan Hüseyin Bey b. Cafer meclis-i şer‘-i şerîf-i enverde ve mahfil-i dîn-i münîf-i ezherde vakf-ı mezbûr[a] sâbıkan mütevellî olan işbu bâ‘isü’l-kitâb Osman Efendi b. Ali mahzarında bi’t-tevliyye ikrâr-ı tâm ve takrîr-i kelâm edip mezbûr Osman Efendi vakf-ı mezbûra mütevellî olup tevliyyet-i mezbûrdan azl ve yerine ben mütevellî olmağla mâl-ı vakf olan bin beş yüz guruşun beş yüz guruşu Mosis nâm zimmî zimmetinde olmağla meblağ-ı mezbûr ile beni mezkûr Mosis üzerine havâle eyledikde ben dahi kabûl ve bâkī bin guruşunu işbu meclis-i şer‘de nakid bana teslîm ben dahi yedinden bi’t-tamâm ahz u kabz edip husûs-ı mezbûra müte‘allika mezkûr Osman Efendi ile bi vechin mine’l-vücûh da‘vâ ve nizâ‘ımız kal[ma]mışdır dedikde gıbbe’t-tasdîki’l-mu‘teberi’l-vicâhî, mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Recebi’l-ferd li sene seb‘a ve tis‘în ve elf. Şuhûdü’l-hâl: El-Hâc Mehmed b. Mehmed, Yusuf Bey b. Ali, el-Hâc Hüseyin b. Abdullah, Ahmed Çelebi b. Yusuf, Ahmed Ağa b. el-Hâc Mehmed.