İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 93 Hüküm no: 45 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Şâkir’in, Tanaş v. Kostandi’yle aralarındaki borç meselesinin mahallî mahkemeye havale edildiği 4428 guruş maddesi mahâllinde mürâfa‘aya havâle bâbında emir istid‘âsı Ma‘rûz Sâdır olan fermân-ı âlîlerine imtisâlen işbu arzuhâl ve hâmişinde <> muharrer emr-i âlî-şân kaydı ve muktezâ ve derkenârına ve merbût olan bir kıt‘a i‘lâm-ı şer‘î ve iki kıt‘a temessüklere nazar olundukda İnöz ahâlîsinden ve hâssa <> hasekilerinden es-Seyyid Mehmed Şâkir Ağa b. el-Hâc Hasan’ın Dersa‘âdet’de Vezîr Hânı’nda mütemekkinler Sarrâf Lambek ve şerîki Ohan zimmîlere cihet-i deyn-i şer‘îden zimmetinde deyni olan on iki bin guruşa mezbûr es-Seyyid Mehmed Şâkir Ağa’nın emriyle duhan tüccârından Tanaş v. Kostandi nâm zimmî kefîl ve zâmin olup ba‘dehû deyn-i mezkûru bi-hükmi’l-havâle mersûmâna edâ ve teslîm etmekle ol vechile kefîl-i mersûm Tanaş zimmînin merkūm es-Seyyid Mehmed Şâkir Ağa zimmetinde bi’l-mürâca‘a hakkı olan meblağ-ı mezkûr mukābelesinde mukaddemâ rehn etmiş olduğu İnöz kasabasında vâki‘ bir bâb mülk menzil ve bir kıt‘a mahzeni bey‘ ve semeninden istifâ-yı deyne mersûm Tanaş zimmîyi vekâlet-i devriye ile vekîl eylediğine binâen mahâllinde ber-nehc-i şer‘î terâfu‘ olunmak bâbında bi’l-istid‘â sâdır olan emr-i âlî-şân [mûcibince] mahâlline lede’l-vürûd tarafeyn bi’l-muvâcehe terâfu‘-ı şer‘-i şerîf olundukda merkūm es-Seyyid Mehmed Şâkir Ağa’nın zikrolunan menzil ve mahzende alâkası olmadığı lede’ş-şer‘i’l-enver zâhir oldukdan sonra deyn-i mezkûrun sekiz bin guruşunu edâ ve îfâ ve bâkī dört bin guruşuna dahi iki yüz kırk senesi Cumâdelûlâsı’nın onuncu gününden üç yüz altmış bir gün va‘de ile bir kıt‘a temessük i‘tâsıyla fasl-ı husûmet olunduğu sâbıkā İnöz Nâibi İbrahim Edhem Efendi dâ‘îlerinin i‘lâmından dört bin dört yüz yirmi dokuz guruşa nâtık bir kıt‘a mu‘anven ve mersûm tahvîl vermiş ve mezbûr es-Seyyid Mehmed Şâkir Ağa’nın bacanağı İnözlü Mehmed Said Efendi’nin dahi mersûm Tanaş zimmîye cihet-i karzdan dört yüz kırk beş guruş âhar deyni olduğu merbût olan temessüklerden müstebân oldukdan sonra mezbûrân es-Seyyid Mehmed Said Efendi ve es-Seyyid Mehmed Şâkir Ağa’dan her biri deyn-i mezkûrlarını hâlâ edâ etmeyip ibtâl-i hakkı mûcib harekâta cesâret eyledikleri beyânıyla meblağayn-ı mezkûreynin mezbûrândan mahâllinde terâfu‘-ı şer‘ olunarak tahsîli’çün Çirmen sancağı mutasarrıfı sa‘âdetlü atûfetlü paşa hazretlerine hitâben emr-i celîlü’ş-şân sudûrunu mersûm Tanaş zimmî işbu arzuhâliyle istid‘â etmeğin bu sûretde merkūm es-Seyyid Mehmed Şâkir Ağa’nın bâ-i‘lâm-ı şer‘î mahkûmun-bih deyninden dört bin guruş bâkī kalmış iken ziyâde dört yüz yirmi dokuz guruşu ne cihetledir ve merkūm es-Seyyid Mehmed Said Efendi’nin dahi deyni vâki‘ midir mahâllinde bi’l-muvâcehe terâfu‘-ı şer‘-i şerîfe muhtâc olduğundan ber-vech-i istid‘â mahâllinde şer‘le rü’yet ve ihkāk-ı hak olunmak bâbında emr-i âlî-şân sudûru muvâfık-ı şer‘-i şerîf olup ancak mutasarrıf-ı müşârün-ileyhe hitâb ilâvesi re’y-i rezîn-i âsafânelerine menût idüğü İstanbul Mahkemesi’nden huzûr-ı âlîlerine i‘lâm olundu. Fî 17 S sene 1242