İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 94 Hüküm no: 46 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahvehane zannıyla kapatılan berber dükkânının yeniden açılması için izin talebi Kahvehâne zannıyla seddolunmuş berber dükkânı küşâdı Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar olundukda İstanbul’da Kumkapı kurbünde İbrahim Paşa Câmi‘-i şerîfi civârında keresteci dükkânı karşısında vâki‘ gediğine şirâen mâlike olduğu Başmuhâsebe’de es-Seyyid Mustafa Usta ismine mukayyed ve taht-ı nizâma dâhil ve mu‘teber bir bâb berber dükkânı bundan akdem mecmû‘-ı kahvehânelerin def‘i bâbında celâdet-rîz-i sahîfe-i sudûr olan fermân-ı âlem-mutâ‘ mûcibince kahve dükkânı olmak zannıyla sedd ü bend olunmuş olduğu ve dükkân-ı mezkûrdan gayrı bir mahâlden bir akçe medâr-ı ma‘âşı olmadığı beyânıyla dükkân-ı mezkûrun feth ve küşâdına izin ve ruhsat-ı seniyyeleri erzân buyurulmasını sahibe-i arzuhâl Hadîce Hatun câriyeleri niyâz ve istirhâm eylediği mefhûm-ı arzuhâlden müstebân ve dükkân-ı mezkûr hâmiş-i arzuhâlde mastûr derkenâr nâtık olduğu üzre muhâsebe-i mezkûrede mukayyed ve şurût-ı nizâma dâhil ve mu‘teber kadîm berber dükkânı idüğü esnâf-ı merkūme kethudâsı İbrahim Ağa ve şeyhi Musa Efendi ve du‘âcısı İsmail Efendi [10a] ve yiğitbaşısı es-Seyyid Mehmed Nuri Ağa ve çavuşu Mustafa Usta ve köşe ustası Selim Usta ve sâir nizâm ustaları kullarının nezd-i dâ‘iyânemde ihbârlarıyla nümâyân olduğu ma‘lûm-ı ilm-i âlem-ârâ-yı düstûrâneleri buyruldukda dükkân-ı mezkûr bu vesîle ile kahvehâne şekline girmeyip memnû‘âtdan masûn berber dükkânı olarak isti‘mâl olunmak şartıyla hâline merhameten küşâdına müsâ‘ade-i merhamet-âde-i müşîrâneleri erâzân [erzân] buyurulmak mutlaka re’y-i rezîn-i isâbet-karîn-i sâmîlerine menût ve mütevakkıf mevâddan idüğü İstanbul Mahkemesi’nden huzûr. Fî 14 min-S sene 1242