İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 95 Hüküm no: 47 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Babek ile Nikogos v. Abraham’ın 2500 guruşa sulh oldukları 2500 guruşa sulh Ma‘rûz Mübârek rikâb-ı kamer-tâb-ı husrevânîye takdîm-i arzuhâl eden Sahtiyâncı Mirasyedioğlu Kirkor v. Babek zimmî evvelâ Çarşamba günü Arz Odası’nda huzûr-ı bâhirü’n-nûr-ı vekâlet-penâhîlerinde ve ba‘dehû şifâhen sâdır olan fermân-ı cihân-mutâ‘larına imtisâlen dâ‘îhânelerinde ma‘kūd meclis-i şer‘-i münîrde derûn-ı arzuhâlde mastûrü’l-ism Eğinli Semercioğlu Nikogos v. Abraham zimmî muvâcehesinde benim mersûm Nikogos zimmîye cihet-i karzdan deynim olan yirmi yedi bin guruş gerek kendüye ve gerek kabza vekîli işbu hazır bi’l-meclis Sarrâf Abraham v. Bogos zimmîye tamamen edâ ve îfâ etmiş iken mersûm Nikogos zimmî mâlımdan bi-gayr-ı hakkın fuzûlî on beş bin guruşumu ziyâde almağla ziyâde-i mezkûreyi mesfûrdan istirdâd ederim deyü tesâddî eylediğim da‘vâmdan mersûm Nikogos zimmî ile bi’t-tav‘ ve’r-rızâ iki bin beş yüz guruş bedel-i medfû‘ ve makbûza sulh olduğumda ol dahi sulh-ı mezkûru ba‘de’l-kabûl bi’l-cümle husûs-ı mezkûra ve ziyâde müdde‘âma ve sâir cemî‘ hukūk-ı şer‘iyyeye müte‘allika âmme-i da‘vâdan ben mersûmân Nikogos ve Abraham zimmîlerin zimmetlerini onlar dahi kezâlik benim zimemimi her birimiz ibrâ-i âm ile kabûlü hâvî ibrâ ve ıskāt eyledik deyü mersûm Kirkor zimmînin bi’l-cümle takrîrini mesfûr Nikogos zimmî ile hâzır-ı mersûm Abraham zimmîden her biri tasdîk ve bu vechile külliyen kat‘-ı nizâ‘ eyledikleri İstanbul Mahkemesi’nden huzûr. Fî 11 Saferü’l-hayr sene [1]242 Nüshateyn