İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 95 Hüküm no: 48 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Edhem Efendi b. Mehmed’in, kiracısı Esma Hatun b. Yusuf ile niza’ı, aylık 7 buçuk guruşa sulh oldukları Şehriye 7 buçuk guruşa kahve dükkânı îcârı Ma‘rûz Zikri âtî bir bâb vakıf dükkânının nısf-ı şâyi‘ine bi’l-icâreteyn mutasarrıf olan derûn-ı arzuhâlde mezkûru’l-ism İbrahim Edhem Efendi b. Mehmed kendi nefsinden asâleten ve nısf-ı şâyi‘-i âharına kezâlik bi’l-icâreteyn mutasarrıfe olan Vesile Hanım bt. el-Hâc Hıfzı Efendi tarafından husûs-ı âtîde vekîl olduğu zât-ı mezbûreyi bi’l-ma‘rifeti’ş-şer‘iyyeârifân İsmail Ağa b. Mehmed ve Salih Ağa b. Ahmed nâm kimesneler şehâdetleriyle ber-nehc-i şer‘î sâbit <> olmağla vekâleten meclis-i şer‘-i münîrde sahibe-i arzuhâl mu‘arrefetü’z-zat Esma Hatun bt. Yusuf muvâcehesinde İstanbul’da Ebulfeth Sultân Mehmed Han -aleyhi’r-rahmetü ve’l-gufrân- Hazretleri Câmi‘-i şerîfleri civârında Malta Çarşısı’nda Yer Hânı derûnunda kâin bir bâb kahve dükkânında mezbûre Esma Hatun şehriye altışar guruş kirâ ile müşâhereten müste’cire ve gedik olmak üzre âhara îcâr etmişdi el-hâletü hâzihî mecmû‘-ı kahve dükkânları şeref-yâfte-i sudûr olan fermân-ı âlî-şân mûcibince sedd ü bend olunarak fîmâ-ba‘d âhar dükkân olarak isti‘mâl olunmak üzre irâde-i seniyye ta‘alluk etmiş ve dükkân-ı mezkûrun ocağı hedm olunmuş olmağla ben dahi şehr-i sâbık Zilhicceti’ş-şerîfe gāyetinde fesh-i akd-i icâre ile dükkân-ı mezkûrdan keff-i yedine mezbûre Esma Hatun’a tenbîh olunmak bi’l-asâle ve bi’l-vekâle murâdımdır deyü da‘vâya tesâddî ve ol vechile beynimizde ba‘de vukū‘ı’l-münâza‘a beynimiz ıslâh olunup ben dükkân-ı mezkûru işbu bin iki yüz kırk iki senesi Muharremi’l-harâmı gurresinden beher şehr yedişer buçuk guruş kirâ kavliyle mezbûre Esma Hatun’a bi’l-asâle ve bi’l-vekâle îcâr ve teslîm eylediğimde ol dahi ber-vech-i muharrer istîcâr ve tesellüm ve kirâ-yı mezkûru mâh-be-mâh cevr ü ezâ etmeksizin bana edâya ben dahi mezbûrenin ihrâcına tesâddî etmemeğe tarafeynden her birimiz ta‘ahhüd eyledik deyü asîl ve vekîl-i mezbûrun takrîrini mezbûre Esma Hatun tasdîk eylediği İstanbul Mahkemesi’nden huzûr-ı âlîlerine i‘lâm olundu. Fî 3 Muharrem sene [1]242