İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 97 Hüküm no: 50 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bergos malikanesi üzerinde Bergos Medresesi müderrisi Hasan Efendi ile medrese mütevellîsi Hâfız Osman’ın ihtilafı Canik sancağında Kavak nâhiyesinde Bergos mâlikânesi medrese mütevellîleri tarafından zabtolunageldiği Ma‘rûz Sâdır olan fermân-ı âlîlerine imtisâlen işbu arzuhâl ve derkenârlara nazar ve mütâla‘a olundukda Canik sancağında Kavak nâhiyesinde Çakallı nâm karyede vâki‘ Balkoz Hânı tevliyetine askerî rûznâmçesi berat-ı şerîfiyle mutasarrıf olan es-Seyyid Abdurrahman b. es-Seyyid el-Hâc Hasan’ın nâhiye-i mezbûrede kâin Bergos Medresesi’nin Anadolu muhâsebesi berat-ı âlî-şânıyla müderrisi olan sahib-i arzuhâl Hasan Efendi ile medrese-i mezbûre mütevellîsi Hâfız Osman beynlerinde zikrolunan Kavak nâhiyesinde Bergos karyesi denmekle meşhûr karyenin mâlikânesi mahsûlüne dâir nizâ‘ları sebkat etmiş ve bâ-işâret-i şeyhülislâmî sâdır olan fermân-ı âlî mûcibince nizâ‘-ı mezkûrun ber-nehc-i şer‘î fasl u hasmına Amasya nâibi molla olarak mübâşir ma‘rifetiyle mahâll-i nizâ‘da lede’t-terâfu‘ şer‘an merkūm Abdurrahman’ın mu‘ârazası men‘ olunmuş olduğundan bahisle mâlikâne-i mezkûrenin zabtı’çün bir kıt‘a fermân-ı celîlü’l-unvân ısdârını merkūm Hasan Efendi işbu arzuhâliyle istid‘â ve husûs-ı mezkûr zımnında Amasya nâibine hitâben sâdır olan emr-i âlî-şân-ı mezkûrun kaydı bâlâsına şerh verilip sûreti hâmiş-i arzuhâle ihrâc olunan nâib-i mûmâ-ileyhin i‘lâmı nâtık olduğu üzre ber-vech-i te‘âmül-i kadîm sâlifü’z-zikr Bergos mâlikânesi medrese-i mezbûre mütevellîleri tarafından zabt ve tasarrufolunagelip öşr-i mahsûlü yine medrese-i mezbûre müderrisi ile mütevellîsi beynlerinde iktisâm olunagelip hân-ı mezkûr mütevellîleri tarafından zabt ve tasarruf olunageldiği ma‘lûm olmadığı ber-nehc-i şer‘î sübût bulmuş ve i‘lâm-ı mezkûrun sebki fenn-i sakke muvâfık olup ihticâca sâlih olduğu İstanbul Mahkemesi’nden huzûr-ı âlîlerine i‘lâm olundu. Fî 11 Saferü’l-hayr sene [1]242