İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 98 Hüküm no: 51 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niyaki v. Kosti’ye borcu olan 301 guruşu ödemesi için Ahmed Ağa’ya tenbih 301 guruş hüküm Ma‘rûz Kapan-ı dakīk sefâin-i reislerinden sahib-i arzuhâl Mudanyalı Yanaki v. Kosti nâm zimmî meclis-i şer‘-i münîrde kapan-ı <> mezkûr tüccârından derûn-ı arzuhâlde mezkûru’l-ism Ahmed Ağa b. Ahmed muvâcehesinde mezbûr Ahmed Ağa bin iki yüz otuz beş senesi Ramazanü’l-mübârekinde beher keyli dörder guruşa olarak yedimden ve mâlımdan iştirâ ve kabz eylediği iki bin yedi yüz doksan dokuz keyl Arnabud hıntasının esmânı olan cem‘an on bir bin beş yüz kırk beş guruşun beş yüz guruşunu Habbâziye Fırını ustası Abram zimmîden şerâit-i şer‘iyyesi üzre havâleten ve dokuz bin dokuz yüz on altı guruşunu dahi ceste ceste nakden bana edâ ve teslîm edip bakīsi olan bin yirmi dokuz guruşu hâlâ zimmetinde kalmağla meblağ-ı bâkī-i mezkûru mezbûr Ahmed Ağa’dan hâlen taleb ederim deyü da‘vâ ettikde ol dahi cevâbında husûs-ı mezkûr vech-i meşrûh üzre olduğunu ikrâr ve i‘tirâf edip lâkin ben meblağ-ı bâkī-i mezkûr bin yirmi dokuz guruşun beş yüz elli guruşunu ol mikdâr medyûnum Ayvansaray Fırını ustası gāib ani’l-beled İslâm b. Abdullah nâm kimesneden ve yüz yetmiş sekiz guruşunu dahi Sıçanlı Fırını ustası gāib ani’l-meclis medyûnum Kirkor v. Kirkor zimmîden her birimiz bir meclisde olduğumuz hâlde havâle-i mukayyede-i sahîha <<-i şer‘iyye>> ile havâle ve her birimiz havâle-i mezkûreyi kabûl ve bâkī kalan üç yüz bir guruşu dahi nakden edâ ve teslîm ve ol vechile mecmû‘unu îfâ etmişidim deyü mikdâr-ı mezkûrda eylediği def‘ini mersûm Yanaki zimmî inkâr etmekle dâfi‘-i merkūm Ahmed Ağa def‘-i mezkûrlarından ancak sâlifü’z-zikr beş yüz elli ve yüz yetmiş sekiz guruş havâle müdde‘âsını lede’t-tezkiye adl ve makbûlü’ş-şehâde idükleri ihbâr olunan Abdurrahman Yazıcı b. Mehmed ve Hasan Yazıcı b. el-Hâc Hüseyin nâm kimesneler şehâdetleriyle bi’l-muvâcehe vech-i şer‘î üzre isbât edip ancak meblağ-ı merkūm üç yüz bir guruşu nakden teslîm müdde‘âsını isbâta kādir olamadığından bi’t-taleb mersûm Yanaki zimmîye ber-nehc-i şer‘î yemîn verilmeğin bu sûretde meblağ-ı bâkī-i merkūm bin yirmi dokuz guruşun yedi yüz yirmi sekiz guruşu ber-vech-i muharrer havâleten edâ olunduğu sâbit olmağla bâkīsi olup ikrârıyla şer‘an lâzım gelen meblağ-ı merkūm üç yüz bir guruşu müdde‘î-i mesfûra edâ ve teslîme merkūm Ahmed Ağa’ya tenbîh olunduğu İstanbul Mahkemesi’nden huzûr. Fî 10 min-S sene 1242