Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 360 Hüküm no: 405 Orijinal metin no: [64a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arzuman v. Bahadır’ın Süleyman Beşe b. Bayram ile alacak davasında sulh oldukları Bennâ tâifesinden Arzuma[n] v. Bahadır nâm zimmî meclis-i şer‘-i şerîf-i enverde mahmiye-i İstanbul’da el-Hâc Hamza mahallesinde sâkin bâ‘isü hâzihi’l-vesîka Süleyman Beşe b. Bayram mahzarında ikrâr ve takrîr-i kelâm edip mezbûr Süleyman Beşe târih-i kitâbdan on ay mukaddem kendi menzili kurbunda vâki‘ çarşıda müceddeden bir mülk hamam binâ etmekle ben dahi ırgādiyyesi benim üzerime olmak üzre mezbûr Süleyman Beşe’ye hamam-ı mezkûru binâya üç yüz elli esedî guruş ücretle kavl edip ve hamam-ı mezkûru binâ ve itmâm ettikden sonra meblağ-ı mezkûrûn iki yüz altmış guruşu mezbûr Süleyman Beşe yedinden ahz u kabz edip doksan guruş kalmağla bundan akdem meblağ-ı bâkī-i mezbûru merkūm Süleyman Beşe’ [64b] den taleb ve da‘vâ eylediğimde beynimizde ba‘de’n-nizâ‘ muslihûn tavassut edip da‘vâ-yı mezkûremden beni mezbûr Süleyman Beşe ile üç esedî guruş üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr üç guruşu merkūm Süleyman Beşe yedinden ahz u kabz ettikden sonra mâ‘adâ seksen yedi guruşa ve bi’l-cümle ücretime müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’l-hısâmla ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin [min Cumâdel]âhire li sene seb‘a ve tis‘în ve elf. Şuhûdü’l-hâl: Yakub b. Mehmed, Ali Beşe b. Abdünnebi, Abdurrahman b. Mehmed, Ahmed Ağa b. Abdullah, Süleyman Beşe [b.] Mustafa Kethüdâ, Ali Çelebi b. Mehmed, Odabaşı Mustafa b. Ahmed.