İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 101 Hüküm no: 54 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoğurtçubaşı Mehmed Ağa’nın, Yorgi ve Kostandi v. Dimitri’ye sade yağ bedelinden 1000 guruş borcu olduğu 1000 guruş hüküm Ma‘rûz Sahibe-i arzuhâl bakkāl tâifesinden Yorgi ve Kostandi veledey Dimitri nâm <> karındaşlar meclis-i şer‘-i münîrde bundan akdem Yoğurtçubaşı es-Seyyid Mehmed Ağa b. es-Seyyid Hasan muvâcehesinde bizim mezbûr es-Seyyid Mehmed Ağa zimmetinde mukaddemâ yedimizden ve müşterek mâlımızdan iştirâ ve kabz eylediği vezn ve fiyâtı beynimizde ma‘lûm revgan-ı sâde semeninden bâkī bâ-temessük iştirâken alacak hakkımız olan bin altı yüz guruşun yüz guruşunu mezbûrun yedinden ahz ü kabz ve beş yüz guruş mutâlebesine müte‘allika âmme-i da‘vâdan dahi merkūmun zimmetini kabûlü hâvî ibrâ ve ıskāt etmemizle bâkīsi olan bin guruşu merkūm es-Seyyid Mehmed Ağa’dan hâlâ taleb ederiz deyü da‘vâ ettiklerinde merkūm es-Seyyid Mehmed Ağa dahi cevâbında kazıyye minvâl-i muharrer üzre olduğunu bi-tamamihâ tâyi‘an tasdîk ve ikrâr etmeğin mûcibince meblağ-ı bakī-i mezbûr bin guruşun müdde‘iyân-ı mersûman Yorgi ve Kostandi zimmîlere edâ ve teslîmiyle merkūm es-Seyyid Mehmed Ağa ilzâm olunduğu İstanbul Mahkemesi’nden huzûr. Fî 24 S sene [1]242