İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 106 Hüküm no: 59 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Astarcı Niğdeli Toma’nın kiracısı olduğu odayı kilitleyip ortadan kaybolduğu, mahkeme kararıyla odanın açıldığı Boncukcu Hânı’nda oda küşâdı Ma‘rûz İstanbul’da Mercan kurbünde vâki‘ Boncukcu Hânı demekle meşhûr kârgir hânın üst katında sol tarafda ikinci bir bâb odada müşâhereten müste’cir olan Astarcı Niğdeli Toma zimmî beş aydan beri oda-i mezkûru mukaffelen terk ve firâr ve gaybet-i münkatı‘a ile gaybûbet eylediğinden bahisle oda-i mezkûrun kuflü küşâd olunmasını bi’l-icâreteyn mutasarrıfesi Maryem bt. Manas Nasrâniyenin oğlu ve tarafından vekâleti şahsını bilir Sahak v. Markos ve Parık v. Mikayil zimmîler haberleriyle zâhir olan sahib-i arzuhâl Abraham v. Agop zimmî işbu arzuhâliyle istid‘â etmekle sâdır olan fermân-ı âlîlerine imtisâlen taraf-ı şer‘-i şerîfden ta‘yîn olunan kâtib Mevlânâ es-Seyyid Salih Afîf Efendi dâ‘îleri ma‘an meb‘ûs ümenâ-i şer‘-i şerîfle oda-i mezkûra varıp hân-ı mezkûr ahâlîsi hazır oldukları hâlde kulfünü [kuflünü] küşâd ve derûnunda bulunan eşyâyı tahrîr ve gāib-i mesfûrun hâli mütebeyyin oluncaya değin kayyım nasbeylediği hân-ı mezkûr odabaşısı Divriğili Abram v. Serkiz zimmî yedine li-ecli’l-hıfz îdâ‘ ve teslîm eylediğini meclis-i şer‘-i şerîfe inhâ eylediği İstanbul Mahkemesi’nden huzûr. Fî 7 S sene 1242