İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 109 Hüküm no: 61 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafından Osman b. Veliyüddin ve zevcesinin, Ayşe bt. Mehmed ile gedik satışında anlaşmazlıkları Medîne-i Üsküdar’da Kazasker mahallesinde bakkāl dükkânı gediği nizâ‘ı Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar ve iktizâ edenleri celb ile ba‘de’s-suâl medîne-i Üsküdar bakkālânından sahib-i arzuhâl es-Seyyid Osman b. Veliyüddin nâm kimesne meclis-i şer‘-i münîrde zevcesi zâtı mu‘arrefe Halime bt. İbrahim nâm hatun hâzıra olduğu hâlde medîne-i mezbûre bakkālânı pazarbaşısı İlyas Ağa b. Osman ile nizâm ustalarından Yuvan v. Marat ve Petro v. Mihal ve Kiryako v. Petro ve Eftat v. Yorgi zimmîler ve sâirleri muvâcehelerinde İstanbul bakkālânı pazarbaşısı Süleyman Ağa ve bölükbaşısı Abdi Çelebi ve nizâm ustaları hazır oldukları hâlde medîne-i mezbûrede Kazasker mahallesinde vâki‘ Aşçıbaşı dükkânı demekle meşhûr bir bâb bakkāl dükkânı derûnunda mevcûde gedik ta‘bîr olunur zevcem hâzıra-i mezbûre ile nısfiyet üzre mâlikleri olduğumuz âlât-ı lâzıme-i ma‘lûmeden ben ber-vech-i muharrer mâlik olduğum nısf hisse-i şâyi‘amı hâzıratü bi’l-meclis zâtı mu‘arrefe Âişe bt. Mehmed nâm hatundan karz aldığım bin guruş deynim mukābelesinde zevcem mezbûrenin izniyle vech-i şer‘î üzre hâzıra-i mezbûre yedine rehin vaz‘ ve teslîm eylediğimden sonra dâyinem hâzıra-i mezbûre meblağ-ı merkūmun tahsîli’çün Asâkir-i Mansûre-i Muhammediye binbaşılarından Üsküdar’a me’mûr ağa kullarına ma‘rifet-i şer‘le hapsettirmekle ben dahi deyn-i mezkûrumu edâ garazıyla âlât-ı gedik-i mezkûru zevcem hâzıra-i mezbûre ile ma‘an bey‘ murâd eylediğimizde pazarbaşı ve nizâm ustaları merkūmûn noksan bahâ teklîfiyle hilâf-ı şer‘-i şerîf ızrâr ve te‘addî etmeleriyle suâl olunup vâki‘ olan te‘addîleri men‘ olunmak matlûbumdur deyü da‘vâ ve şikâyet eylediklerinde onlar dahi cevâblarında o makūle te‘addîlerini külliyen inkârlarından mâ‘adâ zevcân-ı mezbûrânın gedik-i mezkûru hîn-i bey‘lerinde değer-i bahâsına verilmesi husûsuna hasbe’l-vus‘ sa‘y ve ikdâm ve i‘âne ve ihtimâm ederiz deyü ta‘ahhüdleri İstanbul Mahkemesi’nden huzûr. Fî 25 min-S sene 1242