Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 361 Hüküm no: 406 Orijinal metin no: [64b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeriler 16. Ağa Bölük Odası Vakfı muhasebesinin görülmesi Dergâh-ı âlî yeniçerilerinin on altıncı ağa bölüğüne mahsûs oda ahâlîsi tarafından husûs-ı âti’l-beyâna vekîl olduğu Mehmed Beşe b. Mustafa ve Mustafa Beşe b. Ali nâm kimesneler şehâdetleriyle şer‘an sâbit olan Süleyman Çelebi b. Bayram nâm kimesne meclis-i şer‘-i şerîfde oda-i mezkûrenin nukūd-ı mevkūfesi olan beş bin yüz altmış esedî guruşa bi’l-fi‘l mütevellî olan bâ‘isü hâze’l-kitâb el-Hâc Mustafa b. Ömer nâm kimesne mahzarında bi’l-vekâle ikrâr ve takrîr-i kelâm edip bin doksan altı senesi Şa‘bân gurresinde bin doksan yedi Şa‘bânı gurresine gelince beynimizde mezbûr el-Hâc Mustafa’nın muhâsebesini gördüğümüzde asl-ı mâl olan meblağ-ı mezbûr beş bin yüz altmış guruşun dört bin on guruşu zimem-i nâsda olup ve bin yüz elli guruşu der kîse bulunup ve târih-i mezbûrdan târih-i kitâba gelince meblağ-ı mezbûrun murâbahasından hâsıl ve cümlemizin izniyle odanın beynimizde ma‘lûm masrûfuna harc ve sarf eylediği meblağdan mâ‘adâ yüz on dört esedî guruş bâkī ve asl-ı mâl olan meblağ-ı mezbûra zam olunup yedinde olan memhûr temessükü mûcebince cem‘an beş bin iki yüz yetmiş dört guruşdan gayrı mezbûr el-Hâc Mustafa yedinden zimmetinde bir akçe ve bir habbe kal[ma]mışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Molla Mustafa b. Hüseyin tâbi‘-i Hüseyin Efendi, el-Hâc Osman b. Ömer tâbi‘-i Hurrem, Solak Ebûbekir Ağa b. ( ), Cafer Beşe b. ( ).