İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 110 Hüküm no: 63 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Mustafa’nın tütüncü gediğini Mehmed Said Ağa b. Ali’ye sattığı Tütüncü gediği mübâya‘ası Ma‘rûz Sahib-i arzuhâl Tütüncü es-Seyyid Ahmed Ağa b. Mustafa şifâhen şeref-bahş-ı sudûr olan fermân-ı cihân-mutâ‘larına imtisâlen Çarşamba günü Arz Odası’nda huzûr-ı bâhirü’n-nûr-ı düstûrânelerinde ve ba‘dehû dâ‘îhânelerinde ma‘kūd meclis-i şer‘-i münîrde derûn-ı arzuhâlde mezkûru’l-ism haseki-i hâssa Mehmed Said Ağa b. el-Hâc Ali muvâcehesinde tütüncü esnâfı kethudâ ve yiğitbaşı ve lonca ihtiyârları hazır oldukları hâlde takrîr-i kelâm edip hâmiş-i arzuhâlde mastûr i‘lâm kaydı nâtık olduğu üzre İstanbul’da Sultân Bâyezid-i Velî Câmi‘-i şerîfi ebvâbından Buğdaycılar kapısı hâricinde kadayıfçı ittisâlinde kâin mezbûr Said Ağa’nın mutasarrıf ve benim dahi gediğine mâlik olduğumuz bir bâb tütüncü dükkânı bundan akdem muhterik olup derûnunda olan gedik âlâtı tahlîs olundukdan sonra ben mâlımdan mezbûr Said Ağa’ya i‘âne tarîkıyle teberru‘an bin yedi yüz elli guruş def‘ ü teslîm ol dahi mâlından kifâyet mikdârı <> mebâliğ zammıyla dükkân-ı mezkûru kârgir kemer olarak binâ ve kirâ-yı kadîmiyle bana îcâra ta‘ahhüd etmiş iken bu esnâda dükkân arsasını menziline ilâve edip ol vechile beynimizde ba‘de’l-münâza‘a beynimiz ıslâh ve te’lîf olunup ben ber-vech-i muharrer harîkden tahlîs olunup el-yevm yedimde mevcûd ve mahfûz olan âlât-ı gedik-i mezkûru tarafeynin îcâb ve kabûlü ve bey‘-i bâtt-ı sahîh-i şer‘î ve safka-i vâhide ile merkūm Said Ağa’ya bin beş yüz guruş semen-i makbûza bey‘ ve temlîk ve teslîm ol dahi iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik fîmâ-ba‘d âlât-ı gedik-i mezkûr merkūm Said Ağa’nın mal-ı müşterâsı olup benim kat‘â alâkam kalmamışdır deyü takrîrini mezbûr Said Ağa tasdîk ve bu vechile külliyen kat‘-ı münâza‘a eyledikleri İstanbul Mahkemesi’nden huzûr-ı âlîlerine i‘lâm olundu. Fî 3 Rebî‘ülevvel sene 1242