İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 118 Hüküm no: 70 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Reis b. Halil’in, gemisinde çalışan Kostandi’yi darp ederek ölümüne sebeb olmasından diyet hükmü Diyet hükmü Ma‘rûz Cezâyir-i Bahr-i Sefîd’den İmralı adası ahâlîsinden olup şehr-i sâbıkın on yedinci günü hâlik olup merbût olan i‘lâm nâtık olduğu üzre ba‘de’l-keşf hafra ilkā olunan Yani v. Kostandi nâm zimmînin verâseti zevce-i metrûkesi Katerina bt. Nikola Nasrâniye ile sulbî sagīr oğulları Lustomave Todori ve Tanaş ve Yorgaki ve sulbiye sagīre Marina ile zevce-i mersûmenin batnında müstebîn hamle inhisârı bi’l-ihbâr mütehakkık ve mesele-i mirasları seksen sekiz sehmden olup sihâm-ı mezbûreden on bir sehmi zevcesi mersûmeye on dört sehmi oğulları sıgār-ı mersûmûn ile haml-i mezbûra ve yedi sehmi kızı sagīre-i mesfûreye isâbeti tahakkukundan sonra verese-i mersûmeden zevce-i mersûme Katerina Nasrâniye bi’l-verâse ve sıgār-ı mersûmenin tesviye-i emrlerine ve haml-i mezkûrun dahi hisse-i mevkūfesini ahz ü kabz ve hıfz ve ba‘de’l-vilâde tesviye-i emrine vasîleri olmağla bi’l-vesâye meclis-i şer‘-i münîrde Serenci demekle meşhûr Hasan Reis b. Halil muvâcehesinde mûrisimiz zevcem hâlik-i mersûm Kostandi zimmî merkūm Hasan Reis’in kayığında mellâh olup sefîne-i mezbûre İstanbul’da Langa Yenikapısı İskelesi’nde merbût olduğu hâlde şehr-i sâbık-ı Saferü’l-hayrın on yedinci Çarşamba günü ba‘de’l-asr merkūm Hasan Reis sefîne-i mezbûre derûnunda bi-gayr-ı hakkın amden anbâr kapağı ile mûrisimiz hâlik-i mesfûrun bir def‘a başına ve ba‘dehû bir çam tahtasıyla sol böğrüne darb edip ol ânda darb-ı mezkûrdan müteessiren hâlik ve verâseti benimle evlâd-ı sıgārım ve haml-i mezkûra münhasıra olmağla mûcib-i şer‘îsini bi’l-verâse ve bi’l-vesâye taleb ederim deyü da‘vâ ettikde merkūm Hasan Reis dahi cevâbında fi’l-hakīka hâlik-i mersûm Kostandi zimmî vech-i meşrûh üzre çam tahtasıyla darb edip darb-ı mezkûrdan müteessiren hâlik olduğunu bi’t-tav‘ ve’r-rızâ ikrâr ve i‘tirâf edip ve hâlâ şeyhülislâm-ı sellemehullâhü’l-melikü’l-allâm hazretlerinden Zeyd Amr ile döğüşüp Amr’ı bir odun ağacı ile [v]urup katleylese Zeyd’e diyet lâzıme olur mu deyü lede’l-istiftâ olur cevâb-ı bâ-savâbıyla iftâ buyurmalarıyla bu sûretde diyet-i racul olan on bin dirhem-i şer‘î gümüşün sülüsü olan üç bin üç yüz otuz üç ve sülüs-i dirhem-i şer‘î gümüşü târih-i i‘lâmdan bir sene tamamında ve yine sülüs-i âharı olan üç bin üç yüz otuz üç ve sülüs-i dirhem-i şer‘î gümüşü sene-i sâniye tamamında ve yine sülüs-i diğeri olan üç bin üç yüz otuz üç ve sülüs-i dirhem-i şer‘î gümüşü dahi sene-i sâlise tamamında verese-i mersûmûna edâ ve teslîme mersûm Hasan Reis’e tenbîh olunduğu İstanbul Mahkemesi’nden huzûr. Fî 3 Rebî‘ülevvel sene 1242