İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 119 Hüküm no: 71 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Serkiz’in kardeşini evinden çıkarmak istediği Menzil ihrâc istid‘âsı Ma‘rûz Sahib-i arzuhâl Kuyumcu Serkiz zimmî bi’l-ma‘iye istimâ‘a me’mûr Haremeyn-i şerîfeyn müfettişi Emin Beyefendi-zâde fazîletlü Abdülkadir Efendi taraflarından meb‘ûs Kâtib Mehmed Hamdi Efendi dâ‘îleriyle akd olunan meclis-i şer‘-i münîrde li-ebeveyn er karındaşı Kuyumcu Artin zimmî muvâcehesinde Lâleli Câmi‘-i Şerîfi Vakfı mütevellîsi tarafından mürsel Lokman nâm kimesne ile mesfûrânın babaları Süzenci Agop v. Serkiz ve vakf-ı mezkûrdan İstanbul’da Langa Yenikapısı hâricinde kâin Yeni Mahalle ahâlîleri olan Hazer ve Serkiz ve Takfor ve Kigork ve Bağdısar ve Avanes ve Artin ve Kapril zimmîler ve sâirleri hazır oldukları hâlde karındaşım mesfûr fukarâdan olmayıp kâr ve kesbe kādir iken mahalle-i mezbûrede kâin menzilime fuzûlî girip temekkün etmekde ise de ben îcâr etmediğimden gayrı mersûmun ehl-i tezvîr ve gûnâ-gûn sû’-i hareketi olup bi’d-defe‘ât mazarrâtı ve adem-i takayyüdü sebebiyle harîk zuhûru müşâhede olduğundan gerek ahâlî-i mersûmûn ve gerek babası mesfûr ve gerek ben hoşnûd ve râzı olmayıp dilgîr ve müteneffir olmamızla menzilimden ihrâc buyurulmak niyâzımdır deyü istirhâm ve istid‘â ve hâl bu vechile olduğunu hâzırûn-ı mesfûrûn dahi takrîr ve inhâ edip menzil-i mezkûrda bir gûne alâkası olmadığını kendi dahi tasdîk etmeğin bu sûretde ber-muktezâ-yı şerî‘at-i garrâ menzil-i mezkûra müdâhaleye kādir olmamağla ber-mûcib-i istid‘â menzil-i mezkûrdan ihrâc olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 3 Rebî‘ülevvel sene 1242 [Beyaz Beyaz]