İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 120 Hüküm no: 72 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Efendi b. Mehmed’in varislerinin, kendilerine miras kalan tütüncü mahzeni gediğini sattıkları Tütüncü mahzeni gediği mübâya‘ası Ma‘rûz Bundan akdem fevt olan hâcegân-ı Dîvân-ı hümâyûndan es-Seyyid el-Hâc Ömer Efendi b. Mehmed’in verâseti zevce-i menkûha-i metrûkeleri Âişe bt. Abdullah ve Fâtıma bt. Abdullah nâm hatunlar ile sulbî kebîr oğulları es-Seyyid Ali Rıza Efendi ve es-Seyyid Abdullah Efendi ile sulbî sagīr oğlu es-Seyyid Salih Molla ve sulbiye sagīre kızı Zahide Hanım’a ba‘de’l-inhisâr mezbûrân es-Seyyid Ali Rıza <> ve es-Seyyid Abdullah <> Efendiler asâleten ve mezbûretân Âişe ve Fâtıma Hatunlar taraflarından husûs-ı âtîde vekîl olduğu zâtlarını ârifân mezbûr es-Seyyid Abdullah Efendi ile Mustafa b. Hüseyin şehâdetleriyle sâbit olan sagīrân-ı mezbûrân es-Seyyid Salih Molla ve Zahide Hanım’ın vasîyy-i muhtârları Mehmed Efendi b. Süleyman nâm kimesne vekâleten ve vesâyeten her biri meclis-i şer‘-i münîrde İsmail Efendi b. Mustafa muvâcehesinde bi’l-asâle ve bi’l-vekâle ve bi’l-vesâye takrîr-i kelâm edip İstanbul’da Zindânkapısı dâhilinde Canbaz Hânı kurbünde el-Hâc Hasan Ağa ve Ahmed Ağa mahzenleri beynlerinde kâin bir bâb tütüncü mahzeni derûnunda mevcûde ma‘den kaleminde el-Hâc Abdülbaki Ağa ismine mukayyed ve mu‘teber gedik ta‘bîr olunur âlât-ı lâzıme-i ma‘lûme mûrisimiz müteveffâ-yı mezbûr es-Seyyid el-Hâc Ömer Efendi’nin hayatında bâ-hüccet şirâen mâlı olup ba‘de vefâtihî bizimle müvekilletân ve sagīrân-ı merkūmûna mevrûs olmuş idi el-hâletü hâzihî biz âlât-ı gedik-i merkūmu bi’l-asâle ve bi’l-vekâle ve bi’l-vesâye lede’l-müzâyede ve ba‘de inkıtâ‘ı’r-rağbe merkūm İsmail Efendi’nin üzerinde karâr edip el-yevm semen-i misli idüğü bi’l-ihbâr zâhir olan üç bin üç yüz guruş semen-i makbûza tarafeynden bi’l-îcâb ve’l-kabûl bâtten ve sahîhan bi-safkatin vâhidetin merkūm İsmail Efendi’ye bey‘ ve temlîk ve teslîm ol dahi iştirâ ve temellük ve tesellüm ve kabz ve kabûl edip semen-i mezkûrdan sagīrân-ı mezbûrânın hisse-i irsiyeleri defter-i kassâmına idhâl dahi olunmağla ol vechile âlât-ı gedik-i mezkûr merkūm İsmail Efendi’nin mülk-i müşterâsı ve hakk-ı sırfı olup bizim ve müvekkiletān ve sagīrân-ı mezbûrûnun kat‘â alâka ve medhalimiz kalmamağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini bi’l-asâle ve bi’l-vekâle kabûlü hâvî ibrâ ve ıskāt edip bi’l-vesâye dahi kat‘â da‘vâ ve nizâ‘ ve husûmet kalmamışdır deyü ba‘de’t-takrîr ve’t-tasdîk müşteri-i merkūm İsmail Efendi meclis-i şer‘de merkūm es-Seyyid Ali Rıza Efendi mahzarında ben ber-vech-i muharrer ânifen iştirâ eylediğim âlât-ı gedik-i mezkûru tarafeynin îcâb ve kabûlü ve bey‘-ı bâtt-ı sahîh-i şer‘î ve safka-i vâhide ile üç bin üç yüz guruş semen-i makbûza mezbûr es-Seyyid Ali Rıza Efendi’ye bey‘ ve temlîk ve teslîm ol dahi iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt etmemizle fîmâ-ba‘d âlât-ı gedik-i merkūm mezkûr es-Seyyid Ali Rıza Efendi’nin mülk-i mahzı olup benim alâkam kalmamışdır deyü takrîrini mezbûr es-Seyyid Ali Rıza Efendi tasdîk ve gedik-i mezkûrun kayd-ı evveli ref‘ ve terkīn ve kendi ismine tashîhan kayd ile yedine sûret i‘tâsını istid‘â ve fi’l-hakīka gedik-i mezkûr mukayyed ve mu‘teber ve taht-ı nizâma dâhil kadîm gediklerden olduğunu ve bu makūle kayd-ı evveline ta‘arruz olunmayarak tedâvül-i eydî bulunan tütüncü gediklerinin muahharan isimlerine tashîhan sûret i‘tâsı şurût-ı nizâma muvâfık olduğunu esnâf-ı mezbûre kethudâ ve yiğitbaşı ve bi’l-cümle lonca ihtiyârları ihbâr ve inhâ etmeleriyle bu sûretde istid‘âsı şurût-ı nizâma muvâfık olduğundan müsâ‘ade buyurulmak iktizâ eylediği İstanbul Mahkemesi’nden huzûr. Fî-gurreti Rebî‘ülevvel sene 1242