İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 121 Hüküm no: 73 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Defterdar-ı Şıkk-ı Evvel Mehmed Tahir Efendi’nin arsası ile vakıf arsanın bir kısmının ifraz edilerek sokak açmaya izin talebi İstibdâl i‘lâmı Ma‘rûz Ecille-i ricâl-i Devlet-i Aliyye’den hâlâ defterdâr-ı şıkk-ı evvel sa‘âdetlü es-Seyyid Mehmed Tahir Efendi’nin işbu mahtûm takrîri bâlâsına sâdır olan fermân-ı âlîlerine imtisâlen zikri câ’î husûsun evvel-emirde mahâllinde lede’l-mu‘âyene keşf ve tahkīk ve tahrîri’çün cânib-i şer‘-i mutahhardan irsâl olunan Kâtib es-Seyyid Mehmed Tahir Efendi hâssa mi‘mârı hulefâsından es-Seyyid Mehmed Nuri ve Derviş Ahmed ve Abdullah Halîfeler ile nezâret-i dâ‘îlerinde olan Kürkçübaşı el-Hâc Mustafa Ağa Vakfı müsakkafâtından İstanbul’da Destereciler kurbünde Emin Bey mahallesinde vâki‘ bir tarafdan Bezci Mustafa Ağa’nın oğlu Bakkal Ahmed’in tasarrufunda olan muhterik menzil bahçesi ve verâsı ba‘zan Yağhâne zukāğı demekle ma‘lûm tarîk-ı hâssı ve ba‘zan talebe-i ulûmdan Hamidli Mustafa Efendi menzili ve ba‘zan Çitçi Mehmed İzzet’in muhterik menzili arsası ve bir tarafdan Ahmed Çavuş Vakfı’ndan efendi-i mûmâ-ileyhin tasarrufunda olan sed bağçe ve ba‘zan Bevvâb-ı Sultânî el-Hâc Hasan Vakfı’ndan mûmâ-ileyhin tasarrufunda diğer bağçe ve taraf-ı râbi‘i tarîk-ı âm ile mahdûd yine efendi-i mûmâ-ileyhin bâ-temessük-i mütevellî bi’l-icâreteyn müstakillen mutasarrıf oldukları bir bâb arsaya varıp imâm-ı mahalle es-Seyyid el-Hâc Hüseyin Efendi b. es-Seyyid Mehmed ve el-Hâc Osman Ağa b. İbrahim ve Molla Mustafa b. Mustafa ve Ahmed Ağa b. el-Hâc İbrahim ve Tosun b. Ömer ve sâir cerîdede mazbûtü’l-esâmî Müslimîn huzûrlarında akd-i meclis-i şer‘-i nebevî ettikde merhûm mezbûr Kürkçübaşı el-Hâc Mustafa Ağa Vakfı’nın bâ-hüccet kāimmakām-ı mütevellîsi muhâsebe muhzırânından es-Seyyid Ahmed Ağa b. es-Seyyid İbrahim meclis-i ma‘kūd-ı mezkûrda defterdâr-ı mûmâ-ileyh es-Seyyid Mehmed Tahir Efendi ibnü’l-merhûm el-Hâc Osman Efendi’nin kethudâları ve taraflarından husûs-ı âti’l-beyânda vekîl olduğu Veliyüddin Ağa b. Halil ve İbrahim Ağa b. Yusuf nâm kimesneler şehâdetleriyle ber-nehc-i şer‘î sâbit olan el-Hâc Mehmed Ağa b. el-Hâc Ebîbekir mahzarında müvekkil-i mûmâ-ileyh hazretleri derûn-ı takrîrde tastîr olunduğu üzre işbu akd-i meclis-i şer‘-i âlî olunan arsadan zikrolunan tarîk-ı hâssa mülâsık ve mühâzî olan lüzûmu mikdâr mahâl ifrâz ve zikri âtî kendilerinin müfrez mülk arsalarıyla bi’l-istibdâl zukāk küşâd olunarak tarîk-i hâss-ı mezkûrun nâfiz ve vâsi‘ ve tarîk-ı âm olması vücûhla umûr-ı hayriyeden olduğuna binâen müvekill-i mûmâ-ileyh hazretleri ber-vech-i muharrer işbu vakıf arsadan lüzûmu mikdâr arsa kendi mâlik <> oldukları mülk arsa ile istibdâl olunmasını murâd etmeleriyle arsateyn-i mezbûreteyn keşf ve misâha ve tahmîn olunup istibdâli cânib-i vakfa enfa‘ ise i‘lâm olunmak bi’t-tevliye matlûbumdur dedikde evvelen mecmû‘-ı arsa-i mevkūfe-i mezkûre misâha olundukda tarîk-ı âm tarafından arzan yirmi dört buçuk zirâ‘ ve tûlen otuz üç buçuk zirâ‘ terbî‘an sekiz yüz yirmi bir zirâ‘a bâliğ olmağla tarîk-ı hass-ı merkūmdan tarîk-ı âmma gelince li-ecli’l-istibdâl ifrâz ve alâmât-ı fâsıla vaz‘ıyla imtiyâz olunan tûlen kezâlik otuz üç buçuk zirâ‘ ve arzan beş zirâ‘ terbî‘an yüz altmış yedi buçuk zirâ‘ mahâllin beher zirâ‘ı dörder guruşdan altı yüz yetmiş guruşa resîde oldukdan sonra müvekkil-i mûmâ-ileyhin arsa-i merkūme-i mezkûre karşısında vâki‘ Yahya Paşa Sarayı demekle meşhûr tahrîr ve tavsîfden müstağnî evkāf-ı müte‘addide ile mahlût bâ-temessük tasarruflarında olan bir bâb muhterik menzil-i kebîrin arsa-i mevkūfe-i mezkûre mukābilinde tarîk-ı âmma küşâde kebîr zukāk kapısının sol tarafında kâin bi-tarîkı’ş-şirâ bâ-hüccet müstakillen mâlik oldukları ma‘lûmü’l-hudûd ve’z-zirâ‘ arsa-i vâsi‘a ifrâz ve imtiyâz kılınan tarîk-ı âm tarafından Çiftesu hazîneleri açıklığına varınca arzan on zirâ‘ ve tûlen yirmi zirâ‘ terbî‘an iki yüz zirâ‘ mülk arsanın beher zirâ‘ı beşer guruşdan bin guruş ve tarîk-ı âm [15b] tarafında mevcûd arzan on zirâ‘ ve kadden on zirâ‘ terbî‘an yüz zirâ‘ kârgir ana dîvârın beher zirâ‘ı üçer guruşdan üç yüz guruş ki cem‘an mülk arsa ve kârgir dîvârın kıymeti bin üç yüz guruşa bâliğ olup ol vechile sâlifü’l-beyân iki yüz zirâ‘ arsa-i memlûke-i müfreze mârrü’z-zikr ifrâz olunan yüz altmış yedi buçuk zirâ‘ arsa-i merkūmeden vüs‘at ve rağbet ve ücret ve kıymet cihetlerinden ezyed ve evfer ve arsa-i merkūme-i mezbûrenin ifrâzı vakfa muzır olmayıp istibdâli cânib-i vakfa enfa‘ ve evlâ olduğunu mi‘mârân-ı mezbûrân ve sâir ehl-i vukūf hâzırûn-ı merkūmûnun haberleri inhâ olunmağla istibdâl-i mezkûr için izn-i hümâyûnu müş‘ir bâlâsı tuğrâ-yı garrâ-yı hazret-i cihândârî ile mu‘anven emr-i âlî-şân i‘tâ buyurulmak bâbında emr u fermân hazret-i veliyyü’l-emrindir. Fî 3 min-Rebî‘ülevvel sene 1242