Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 361 Hüküm no: 407 Orijinal metin no: [64b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Zülfikár ile ortağının un satışından Pilaş v. Pandazi’de alacakları olduğu Mahmiye-i İstanbul’da Unkapanı kurbunda Hoca Hayreddin mahallesinde sâkin uncu Hasan Beşe b. Zülfikār asâleten ve mezbûr Hasan Beşe’nin şerîki İlya v. Yani tarafından husûs-ı âti’l-beyâna vekîl olduğu kapan-ı mezbûrede uncu olan Panayot v. Dimitri ve Yani v. Nikola nâm zimmîler şehâdetleriyle şer‘an sâbit olan Todori v. Yorgi vekâleten meclis-i şer‘-i şerîf-i enverde kasaba-i Beşiktaş’a tâbi‘ Arab iskelesi fırınında ekmekçi olan Pilaş v. Pandazi nâm zimmî mahzarında üzerine her biri asâleten ve vekâleten da‘vâ ve takrîr-i kelâm edip mezbûr Pilaş gāibân ani’l-meclis Nikola ve Yorgi nâm zimmîler ile zikr olunan Arab iskelesinde vâki‘ fırında ekmekçilikte şerîkler olmağla mezbûrûn Pilaş ve Nikola ve Yorgi zimmîler bundan akdem her biri âharın zimmetinde lâzım gelen mikdâr meblağa kefîl olmak üzre yedimizden müşterâ ve makbûz beynimizde i[lm-i] şer‘î ile ma‘lûm dakīk bahâsından ba‘de küllî hesâb on dokuz bin dört yüz otuz akçe hakkım olup meblağ-ı mezbûrun iki bin akçesini bundan akdem vefât [eden] mezbûr Yorgi’den ahz u kabz edip on yedi bin dört yüz otuz akçe hakkım zimmetinde bâkī kalmağın hâlâ mezbûr Pilaş’a suâl olunup meblağ-ı bâkī-i mezbûrun alıverilmesi bi’l-asâle [ve] bi’l-vekâle matlûbumdur dediklerinde gıbbe’s-suâl mezbûr Pilaş cevâbında fi’l-hakīka kaziyye vech-i meşrûh üzre olmağla meblağ-ı bâkī-i mezbûr on yedi bin dört yüz otuz akçe hâlâ zimmetinde lâzımü’l-edâ deyni olduğunu tâyi‘an ikrâr ve i‘tirâf etmeğin mûcebince meblağ-ı bâkī-i mezbûr on yedi bin dört yüz otuz akçeyi müdde‘iyân-ı mezbûrâna edâ ve teslîme merkūm Pilaş’a tenbîh olunup mâ hüve’l-vâki‘ bi’t-taleb ketb [olundu]. Şuhûdü’l-hâl: Ali Efendi el-Kâtib, Ali Beşe b. Bâli, Mehmed Efendi b. Ahmed, İbrahim Efendi el-Kâtib, Mihayil v. Dimitri, Mihayil v. Kosta.