İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 123 Hüküm no: 74 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli’den gelen 28900 baş koyunun dağıtımı 28900 re’s Rumeli ağnamı tevzî‘i Ma‘rûz Âsitâne-i aliyye sekenesinin akvât-ı yevmiyeleri’çün işbu sene-i mübârekede Boğdan cânibinden cem‘an yirmi sekiz bin dokuz yüz re’s ağnam sevk eden celeb tâifesinden Yo[r]gi Poşu ve Lüli ve Yanaki ve Paskal ve Hristo ve Yani ve Kostandi ve Tohari ve İsteryo ve Yorgi ve Kurukafa ve diğer Yorgi zimmîler meclis-i şer‘-i münîrde dergâh-ı âlî kapıcıbaşılarından hâlâ ser-kassâbân-ı hâssa izzetlü el-Hâc Mustafa Ağa tarafından mürsel kassâbân kethudâsı el-Hâc Hasan Ağa ve bi’l-cümle kasab ustaları muvâcehelerinde her biri takrîr-i kelâm edip bu def‘a ber-vech-i bâlâ sevk ve tesyîr eylediğimiz cem‘an yirmi sekiz bin dokuz yüz re’s ağnamın sakatları’çün nesne mutâlebe etmeyerek beher vakıyye lühûmunu kasabbaşı-i mûmâ-ileyh ma‘rifetiyle narh-ı cârîsi üzre yirmi yedişer paraya kasab esnâfına bey‘a ta‘ahhüd eylediğimizde onlar dahi kabûl ve ber-mu‘tâd Perşembe ve Cum‘a günleri ta‘tîl ederek haftada beş gün Rumeli ve beş gün dahi Anadolu ağnamını tevzî‘a ve yevm-i tevzî‘den elli bir gün vürûdunda yaftalarımızı ve doksan bir gün tamamında dahi lâzım gelen semenlerini bize edâya ve beher vakıyye lahm-ı ganemi üçer para fâide zammıyla otuzar paraya ibâdullâha bey‘a ta‘ahhüd eylediler deyü takrîrlerini kasab esnâfı merkūmûn tasdîk eyledikleri İstanbul Mahkemesi’nden huzûr. Fî-selh-i S sene 1242