İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 131 Hüküm no: 82 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgancılar Çarşısı’ndaki Evliyahanı’nın yıkılmak üzere olan yerlerinin keşf ve tamiri Evliyâhânı’nın inhidâma mâil olan mahallerinin ta‘mîri için keşf i‘lâmı Ma‘rûz Âsitâne-i aliyyede vâki‘ yorgancı esnâfının Bâb-ı Âlî’ye takdîm eyledikleri işbu bir kıt‘a arzuhâlleri bâlâsına sâdır olan fermân-ı âlîlerine imtisâlen savb-ı şer‘-i enverden irsâl olunan bâş kâtib mevlânâ İbrahim Ârif Efendi ve Haremeyn-i şerîfeyn müfettişi olup İstanbul pâyesiyle tekrîm buyrulan zâde-i Emin Paşazâde fazîletlü mîr Abdülkadir Efendi taraflarından mürsel Kâtib Hüseyin Efendi hâssa mi‘mârı hulefâsından İsmail Kemâlî ve Mustafa Sâib Halîfeler ve binâ ve sukūf ahvâline muttali‘ ehl-i vukūfdan Hamamcıbaşı Usta Mikayil ve ustalarından Simon ve Nikogos ve Vartan zimmîler ile sa‘âdetlü Dârü’s-sa‘âdeti’ş-şerîfe ağası hazretlerinin nezâret-i aliyyelerinde olan evkāfdan ashâb-ı hayrâtdan merhûm Süleyman Ağa Vakfı müsakkafâtından İstanbul’da Çarşı-yı Kebîr’de Yorgancılar sûkunda kâin Evliyâhânı demekle şehîr Çakır Ağa nâm sahibü’l-hayr vakfıyla mahlût bir bâb kârgir hân derûnuna varıp cerîdede mazbûtü’l-esâmî Müslimîn huzûrlarında ba‘de akdi’l-meclis hân-ı mezkûrda vâki‘ merhûm mezbûr Süleyman Ağa Vakfı’nın bi’l-icâreteyn mutasarrıflarından olup hân-ı mezkûrun fevkānî zukāk tarafında kâin bir bâb odanın gedik mâliki yorgancı esnâfından es-Seyyid el-Hâc Ali Efendi b. es-Seyyid Feyzullah ve tahtânî nerdübân başında kâin bir bâb odanın gedik mâliki esnâf-ı merkūmeden Hüseyin Ağa b. Ali nâm kimesneler ile fevkānî zukāk tarafında kâin bir bâb odanın gedik mâliki İznikli el-Hâc Osman Beyzâde Eyüb Bey tarafından husûs-ı âtîde vekîl olduğu yine esnâf-ı merkūmeden Süleyman Efendi b. Mehmed ve yiğitbaşı Mustafa Efendi b. Mustafa nâm kimesneler şehâdetleriyle sâbit olan esnâf-ı merkūme kethudâsı es-Seyyid el-Hâc Osman Ağa b. el-Hâc İsmail nâm kimesnelerden her biri meclis-i ma‘kūd-ı mezkûrda hân-ı merkūmda vâki‘ merhûm mezbûr Süleyman Ağa Vakfı’nın bi’l-icâreteyn mutasarrıflarından Sarrâf Serkizv. Markos zimmî ile bi’l-cümle yorgancı esnâfı hazır oldukları hâlde merhûm mezbûr Süleyman Ağa Vakfı’nın mütevellîsi ağa-yı müşârün-ileyh hazretlerinin ser-kâtibleri Ali Efendi b. Abdullah tarafından mürsel vekîl-i şer‘îsi câbî-i vakf Teberdâr es-Seyyid el-Hâc Mehmed Ağa b. Ebîbekir ve merhûm ve mezbûr Çakır Ağa Vakfı’nın bi’l-meşrûta mütevellîsi Hadîce Hanım bt. İbrahim Bey tarafından mürsel vekîl-i şer‘îsi kâtib-i vakf Hâfız Mehmed Bey Efendi b. el-Hâc İbrahim nâm kimesneler mahzarlarında işbu derûnunda akd-i meclis-i şer‘-i âlî olunan hânın mârrü’z-zikr Süleyman Ağa Vakfı’ndan olan zukāk kapısı fevkinde kâin ulyâ ve vustâsında vâki‘ dört bâb oda olup ulyâda vâki‘ odaların kârgirlerinde zukāk cânibinde [17b] kârgir dîvârlarında ba‘zı sükūk mer’î ve müşâhed ve bâ-husûs bu def‘a bi-kazâillâhi te‘âlâ vukū‘ bulan harîkde Çarşı-yı Kebîr’in ekser mahallerinin kemerleri münhedim olup bakī kalanları dahi çarçabuk ta‘mîr olunmadığı hâlde yağmur vukū‘unda külliyen münhedim olacağı bedîhî ve âşikâr olduğuna binâen bu def‘a sudûr eden emr-i âlî-şâna imtisâlen Çarşı-yı Kebîr-i mezkûrun inhidâma mâil olan kemerleri dahi hedm-birle mecmû‘u münhedim olan kemerleri tecdîd ve ta‘mîre muhtâc olan mahalleri ta‘mîre cümle esnâf müte‘ahhid olduklarına mebnî bizler dahi işbu hân-ı mezkûrun kapısı önünde olan kemeri fenn-i mi‘mârî üzre inhidâma mâil olmağla hamamcıbaşı ve hamamcı ustaları bâ-emr-i âlî hedm-birle masrûfunu bizlere rücû‘ şartıyla müceddeden inşâya bed’ etmeleriyle hân-ı mezkûrun zukāk kapısı kemeri mi‘mârân-ı mezbûrân misâhalarıyla tûlen altı zirâ‘ altı parmak ve arzan beş zirâ‘ terbî‘an otuz bir zirâ‘ altı parmak ve üzerinin devri yirmi zirâ‘ olarak mahâll-i mezkûra vehn tatarruk eder ise yahud bi’l-külliye münhedim olur ise biz ve müvekkil-i mûmâ-ileyh Eyüb Bey oda-i mezkûrların gedik mâlikleri olduğumuza mebnî kendi mâlımızdan teberru‘an li’l-vakf ta‘mîr ve tecdîd ve mutasarrıfları dahi masrûfumuz için rızâlarıyla bizlere birer mikdâr akçe i‘âne etmek üzre bi’l-asâle ve bi’l-vekâle her birimiz müte‘ahhid olduk dediklerini mütevellî vekîlleri mezbûrân ile hâzırûn-ı merkūmûndan her biri tasdîk eylediklerini kâtibân-ı mezbûrân mahâllinde tahrîr ve ma‘an meb‘ûs ümenâ-i şer‘le meclis-i şer‘a inhâ eyledikleri İstanbul Mahkemesi’nden huzûr. Fî 5 Ra sene 1242