Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 362 Hüküm no: 408 Orijinal metin no: [64b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Hacı Mehmed ile oğlunun evlerini 34. Cemaat Oda Vakfı’na bey‘ bi’l-istiğlâl yoluyla sattıkları Mahmiye-i İstanbul’da Gurebâ Hüseyin Ağa mahallesinde sâkine olup zâtı ma‘rifet-i şer‘iyye ile ârifân olan Hüseyin Odabaşı b. Abdullah ve demirci el-Hâc Mustafa b. ( ) nâm kimesneler ta‘rîfleriyle mu‘arrefe olan Havva bt. el-Hâc Mehmed ile sadrî kebîr oğlu Ali Beşe b. el-Hâc Ahmed nâm kimesne meclis-i şer‘-i şerîf-i enverde otuz dört cemâ‘ate mahsûs odanın mühimmâtı için mevkūfe nukūdun bi’l-fi‘l mütevellîsi olan bâ‘isü hâze’l-kitâb Haffâf Ali Çelebi b. Abdullah mahzarında her biri ikrâr-ı tâm ve takrîr-i kelâm edip ale’l-iştirâki’s-seviy silk-i mülkümüzde münselik olup mahalle-i mezbûrede vâki‘ bir tarafdan Kethüdâ Paşa mülkü ve bir tarafdan Murad Paşa hazînedârı mülkü ve bir tarafdan Sefer Ağa mülkü ve bir tarafdan tarîk-i hâs ile mahdûd dâhilinde üç oda ve bir matbah ve bir kiler ve havlu ve bahçe ve su kuyusu ve kenîfi ve hâricinde iki bâb fevkānî oda ve tahtında ahırı müştemil mülk menzilimi cümle tevâbi‘ ve levâhıkı ile mütevellî-i mezbûr Ali Çelebi bi tarîki’l-istiğlâl üç yüz on beş esedî guruşa bey‘ ve teslîm ol dahi ber vech-i muharrer yedinde olan mâl-ı vakf-ı mezbûr ile iştirâ ve kabz ve tesellüm eyledikden sonra semeni olan meblağ-ı mezbûru yedinden ale’l-iştirâki’s-seviy ahz u kabz eyledik menzil-i mahdûd-ı mezkûru mütevellî-i mezbûr gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan üç yüz altmış gün tamâmına değin kırk yedi guruş ile bir rub‘ guruşa yine bize îcâr ve teslîm biz dahi [65a] ber vech-i istîcâr kabûl eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Hüseyin Odabaşı b. Abdullah, el-Hâc Mustafa b. demirci, Aşçı İbrahim Beşe, Mehmed Beşe b. ( ), el-Hâc Ali b. Mahmud b. Şaban, Yirmi iki cemâ‘at odabaşı[sı] Ali Çelebi, el-Hâc Mustafa b. Tevekkül, İbrahim Çelebi b. Ahmed, Ahmed b. Sefer.