İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 145 Hüküm no: 93 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Trabzonî Mehmed Ağa b. Mustafa ile Trabzonî Mehmed Yazıcı b. Mustafa’nın gemicilik ortaklığında 1100 guruşa sulh oldukları 1100 guruşa sulh ve edâya tenbîh Ma‘rûz Sahib-i arzuhâl Anapa tüccârından Trabzonî es-Seyyid Mehmed Ağa b. es-Seyyid Mustafa nâm kimesne meclis-i şer‘-i enverde derûn-ı arzuhâlde mezkûru’l-ism rüesâ-yı sefâinden Trabzonî Mehmed Yazıcı b. Mustafa nâm kimesne muvâcehesinde bin iki yüz otuz üç senesi hilâlinde şayka ta‘bîr olunur bir kıt‘a sefînenin kırk sehm i‘tibâriyle yirmi sehmi benim ve on sehmi mezbûr Mehmed Yazıcı’nın ve beş sehmi Kapan-ı dakīk tüccârından reisler kethudâsı sâbık gāib ani’l-meclis Ali Ağa’nın ve beş sehmi kezâlik gāib ani’l-meclis Teberdâr Abdullah Ağa’nın yedimizde iştirâken ve şâyi‘an mülkümüz olup sefîne-i mezkûrenin ücret-i navul ticâretinden hâsıla olan fâide gerek ücret-i mellâhân ve gerek sefîne-i mezkûrenin kalafat ve sâir masrûfâtı ihrâc olundukdan sonra ber-i‘tibâr-ı merkūm beynimizde iktisâm olunmak üzre târih-i merkūmdan akd-i şirket ile ben ve şerîklerim gāibân-ı mezbûrândan her birimiz merkūm Mehmed Yazıcı’yı sefîne-i merkūme derûnuna reis nasbeylediğimizden sonra mezbûr Mehmed Yazıcı iki yüz otuz dört senesi Şa‘bânü’l-mu‘azzamı gurresinden otuz yedi senesi Şevvali’l-mükkeremi gāyetine gelince üç sene dört ay müddetde sefîne-i mezkûreye râkiben Anapa ve Tuna ve Trabzon ve Abaza diyârında Faş ve Soğuksu câniblerine iyâb ü zehâb edip ba‘dehû fesh-i akd-i şirket-birle müddet-i mezkûrede hâsıl olan mebâliğin hesâbını bundan akdemce sehv ü galatdan ârî yegān yegān sahîhan rü’yet eylediğimizde ber-vech-i muharrer ücret-i <> mellâhân ve sâir mesârif-i lâzıme ihrâc olundukdan sonra fâide-i hâsıladan benim ber-i‘tibâr-ı merkūm hisseme isâbet eden üç bin beş yüz elli altı guruşu merkūm Mehmed Yazıcı kabz-ı mâl olmak takrîbiyle bana vermeyip kendi umûruna sarfla istihlâk etmekle meblağ-ı mezkûru mezbûr Mehmed Yazıcı’dan hâlâ taleb ederim deyü merkūm Mehmed Yazıcı’nın inkârına mukārin tesâddî eylediğim da‘vâmdan bâ-tavassut-ı muslihîn mezbûr Mehmed Yazıcı ile bi’t-tav‘ ve’r-rızâ bin yüz guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ meblağ-ı merkūm üç bin beş yüz elli altı guruşa varınca ziyâdesi olan iki bin dört yüz elli altı guruşa ve husûs-ı şirkete işbu târih-i i‘lâma gelince sâir beynimizde cereyân eden cemî‘ ahz ü i‘tâ ve mu‘amelât-ı şettâ ve hukūk-ı ma‘lûme ve mechûleye müte‘allika âmme-i da‘vâ ve mutâlebât ve kâffe-i eymân ve muhâsamâtdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl eyledik dediğini mezbûr Mehmed Yazıcı tasdîk ve ibrâdan müstesnâ bedel-i sulh-ı mezkûr bin yüz guruş zimmetinde müdde‘î-i mezbûra sahîhan deyni olduğunu tâyi‘an ve kat‘iyyen ikrâr ve i‘tirâf etmeğin alâ-mûcibi i‘tirâfihî bedel-i sulh-ı mezkûr bin yüz guruşun müdde‘î-i mezbûr es-Seyyid Mehmed Ağa’ya edâ ve teslîmiyle mezbûr Mehmed Yazıcı ilzâm olunduğu İstanbul Mahkemesi’nden huzûr. Fî 7 Ra sene 1242 Nüshateyn