İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 146 Hüküm no: 94 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Temizleyici esnafınakethuda ve nâzır nasbedildiği Sandalcı esnâfına mülhak temizleyici esnâfına müstakil kethudâ ve nâzır nasbı Ma‘rûz Ashâb-ı arzuhâl temizleyici ta‘bîr olunur sandalcı esnâfının emti‘alarını rabt ve ıslâh eder tâifeden es-Seyyid Ahmed ve es-Seyyid Abdülkadir ve Mehmed Salih ve diğer Mehmed Salih ve âhar Mehmed Salih ve Mehmed Said ve es-Seyyid İsmail ve es-Seyyid Hüseyin ve es-Seyyid Mustafa nâm kimesneler ile Mıgır[dıç] ve Bedros ve Haçador ve Nişan ve Agop nâm zimmîler ve sâirleri meclis-i şer‘-i münîrde Âsitâne-i aliyyede vâki‘ sandalcı esnâfının bâ-berât-ı âlî-şân ve bâ-mukābele-i nân ber-vech-i te’yîd kethudâsı es-Seyyid Hâfız Mehmed Emin Ağa ve vekîli es-Seyyid Mehmed Ağa ile yiğitbaşıları Ebûbekir Ağa ve Mehmed Ağa ile müsinn ü ihtiyârlarından es-Seyyid Mehmed Cuma Ağa ve el-Hâc Ahmed Ağa ve Salih Ağa ile re‘âyâdan [20b] Mina ve Sınan ve Nikot ve Mikayil ve Ekna ve Asvador ve Vasil nâm zimmîler ve sâirleri muvâcehelerinde bu âna kadar vukū‘ bulan umûrumuzu kethudâ-yı merkūm <> ve rü’yet edegelmiş ise de ân-be-ân esnâfımızın tekessürüne binâen müstakil kethudâya muhtâc olmamızla içimizden biri üzerimize kethudâ nasb olunmasını iltimâs eylediğimizde esnâf-ı merkūme dahi cevâblarında bizim emti‘amızı fi’l-asl bî-kâr ta‘bîr olunur Fazlı Paşa bodrumunda sâkin işbu hâzırûn bi’l-meclis kimesneler rabt ve ıslâh edegelmişiken temizleyici tâifesi merkūmûn ehven ücret ile i‘mâle ta‘ahhüd eylediklerinden istihdâm etmiş olduğumdan mâ‘adâ temzileyici tâife-i merkūmûnun zuhûru ahd-i karîbde olmağla bu misillü ayrılmak sûretlerine meyl ve teşebbüs eyledikleri hâlde emniyetimiz kalmayacağı ve eğerçi müstakil kethudâ nasbına mümâna‘at olunmaz ise de emti‘amızı dilediğimiz kimesnelere i‘mâl ettirmekde şer‘an ve kānûnen muhtâr olmamızla ihtiyâr eylediğimiz kimesneleri istihdâm ederiz deyip lâkin öteden beri temizleyici tâifesi merkūmûn sandalcı esnâfının işlerini i‘mâl ile me’lûf olduklarından ayrılmak maddesi kendilere müntefi‘ olmayacağı ve bu vesîle ile kethudâ-yı merkūm tarafından dahi hilâf-ı şer‘-i şerîf ve mugāyir-i rızâ-yı âlî temizleyici tâifesi merkūmûna rencîde ve te‘addî ve tekdîr ve tecrîm misillü hareket vukū‘una kat‘â cevâz ve mesâğ olmadığı tarafeyne tefhîm ve fîmâ-ba‘d beynlerinde ayrı gayrı olmayarak kadîmden olageldiği vechile hüsn-i mu‘âşeret ve lâzıme-i yek-cihetî ve ittifâka ikdâm ve gayret ile sâye-i merâhim-vâye-i hazret-i hilâfet-penâhîde cümlesi ta‘ayyüş ve intifâ‘ eylemeleri enseb idüğü gûş-ı hûşlarına ilkā ve telkīn olundukda onlar dahi kadîmi üzre müttefikāne hareket enseb ve esvâb olduğunu tefekkür ile beynleri musâfât olunup ancak kethudâ-yı merkūm es-Seyyid Mehmed Emin Ağa tarafından tâife-i merkūmenin umûr ve husûslarını idâre için içlerinden el-Hâc İbrahim Ağa b. Osman nâm kimesneyi kethudâ vekîli ve es-Seyyid Süleyman Ağa b. el-Hâc Musa nâm kimesneyi-sahh sahh- nâzır nasb ve ta‘yîn eylediğinde onlar dahi umûr-ı kethudâlık ve nezâret-i mezkûreyi bi’l-vekâle idâre ve rü’yet ve bu kimesneyi hilâf-ı şer‘-i şerîf ve mugāyir-i kānûn-ı münîf tekdîr ve tecrîm etmemeğe ta‘ahhüd eylediklerinde temizleyici esnâfı merkūmûn dahi bu vechile râzı olup külliyen kat‘-ı nizâ‘ ve ref‘-i husûmet eyledikleri İstanbul Mahkemesi’nden huzûr. Fî 23 Ra sene 1242