İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 149 Hüküm no: 96 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü esnafına Eğinli İsmail Ağa’nın yerine Mehmed Ağa’nın kethuda nasbedildiği Kömürcü esnâfına kethudâ nasbı ve yedine berat-ı âlî-şân i‘tâsı istid‘âsı Ma‘rûz Âsitâne-i aliyyede vâki‘ kömürcü esnâfının bâ-berât-ı âlî-şân kethudâsı Eğinli İsmail Ağa bu def‘a şifâhen sâdır olan fermân-ı âlîlerine imtisâlen memleketine âzim olup yeri hâlî ve umûr-ı kethudâlık mu‘attal kalmağla esnâf-ı merkūmeden Davud Paşa İskelesi’nde sâkin şehriyü’l-asl el-Hâc Mehmed Ağa b. el-Hâc Ebûbekir kulları kudemâ-yı esnâfdan olup örf ve âdetlerine vâkıf ve şurût-ı nizâmlarını ârif ve her vechile umûr-ı kethudâlığı idâreye muktedir ve cümlesinin merzî ve muhtârları olduğu beyânıyla merkūm el-Hâc Mehmed Ağa esnâf-ı merkūmeye kethudâ nasb ü ta‘yîn olunmasını esnâf-ı merkūmeden Ali ve es-Seyyid Mehmed ve es-Seyyid Salih ve el-Hâc Mustafa ve el-Hâc Hasan ve Abdülkerim ve İbrahim ve Abdurrahman ve Mustafa ve Osman ve Halil ve sâirleri meclis-i şer‘-i münîrde niyâz ve istid‘â ve merkūmun nasbını hâlâ ihtisâb emîni izzetlü ağa çâkerleri dahi istisvâb etmeğin mûcibince merkūm İsmail kethudâlıkdan azl ve yerine merkūm el-Hâc Mehmed Ağa taraf-ı şer‘-i şerîfden esnâf-ı merkūme üzerlerine kethudâ nasb ü ta‘yîn ve umûr-ı esnâfı şer‘-i şerîf ve kānûn-ı münîfe tatbîkan hakkāniyet ve istikāmetle idâre ve rü’yet ve bir kimesneyi hilâf-ı şer‘-i kavîm ve mugāyir-i rızâ-yı âlî bi-gayr-ı hakkın tekdîr ve tecrîmden ictinâb ve mübâ‘adete tenbîh olundukda ol dahi kabûl ve ber-mûcib-i tenbîh harekete ta‘ahhüd etmekle bu sûretde kethudâlık-ı mezkûr merkūm İsmail’in üzerinden ref‘ ve terkīn ve mezbûr el-Hâc Mehmed Ağa’ya tevcîh ve yedine berat-ı şerîf-i âlî-şân sadaka ve ihsân buyurulmak re’y-i rezîn-i isâbet-karîn-i âsafânelerine menût idüğü İstanbul Mahkemesi’nden huzûr. Fî 24 Ra sene 1242