İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 153 Hüküm no: 99 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Süleyman’ın kol oğlanlık görevini, Hüseyin b. Molla İdris’e bıraktığı Kol oğlanlık kasr-ı yedi Ma‘rûz İstanbul ihtisâb mukāta‘ası hademesinden beher yevm mal-ı mîrînin cem‘ ve tahsîline me’mûr birbirlerine kefîl olarak on beş nefer kol oğlanlarından yevmî on beş akçe vazîfe kol oğlanlığa bâ-berât-ı şerîf-i âlî-şân mutasarrıf olan Hüseyin ibnü’l-müteveffâ es-Seyyid Monla İdris meclis-i şer‘-i münîrde mukāta‘a-i mezkûre hademesinin on altı nefer müretteb mülâzımlarından dördüncü mülâzım olup hâlâ ihtisâb veznedârı olan erbâb-ı istihkākdan es-Seyyid <> Mustafa b. es-Seyyid Süleyman muvâcehesinde takrîr-i kelâm edip ben ber-vech-i muharrer mutasarrıf olduğum kol oğlanlığı cihetini hüsn-i rızâ ve ihtiyârım ile bedel-i ma‘lûm ve makbûz-ı müstehlek mukābelesinde hâlâ mukāta‘a-i mezbûre emîni izzetlü ağa bendelerinin re’y ve istisvâbıyla merkūm es-Seyyid Hüseyin’e kat‘iyyen kasr-ı yed ve yedimde olan atîk beratımı dahi huzûr-ı şer‘-i şerîfde teslîm eylediğimde ol dahi tefevvüz ve kabûl etmekle fîmâ-ba‘d cihet-i mezkûrede benim alâkam kalmamışdır deyü takrîrini mezbûr es-Seyyid Hüseyin tasdîk etmeğin bu sûretde cihet-i mezkûre vazîfe-i mersûmesiyle fâriğ-i mersûmun kasr-ı yedinden merkūm es-Seyyid Hüseyin’e tevcîh ve kaleminden yedine müceddeden berat-ı şerîfi âlî-şân sadaka ve ihsân buyurulmasını istid‘â ve istirhâm eyledikleri İstanbul Mahkemesi’nden huzûr. Fî 29 Ra sene 1242