İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 153 Hüküm no: 100 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İrade gereğince sahipleri Arnavut olan Çatladıkapı’daki Çardaklı fırına devlet tarafından el konulup mezada verildiği Cânib-i mîrîden Çardaklı fırını mübâya‘ası Ma‘rûz Zahîre nâzırı izzetlü Mehmed Ârif Efendi bendeleri Âsitâne-i sa‘âdet ve bilâd-ı selâsede vâki‘ Arnabud fırınlarının Müslim hamîrkâr ve hademe-i sâiresinin mukaddemce bâ-irâde-i seniyye yerlerine re‘âyâ ve kendileri mahallerine i‘zâm ve bu def‘a dahi lâzımü’l-huzûr-ı nâzır-ı mûmâ-ileyh nezdine celb ve navul kalemi kuyûduna mürâca‘at ve tatbîk ve kā‘ide-i mer‘iyye-i mîrîyye ve ticârete tevfîk olunarak zikrolunan fırınların derûnlarında mevcûd zehâir ve bargir ve hatab bahâları ve tablakâr ve sâir zimmetlerinde olan matlûbâtlarının ve anbâr-ı âmire mevcûdundan aldıkları zahîre bahâsından zahîre hazîne ve tüccârdan aldıkları zahîre bahâsından tüccâra ve hatab ve saman ve sâir zimemâtlarının yegān yegān hesâbları rü’yet ve yerlerine şimdilik ikāmet sûretiyle re‘âyâdan habbâz ustası ik‘âd ve ikāmet ettirilmiş ve sâye-i veliyyü’n-ni‘amîde nân-ı azîz husûsunda ibâdullâha zarûret çektirilmemek husûsunun vesâili istihsâl olunmuş ise de müddet-i medîde emâneten idâresinde telefâtı mûcib bi’l-âhare zahîre hazînesine ve tüccâra zarar ve hasârı müstevcib olmağla zikrolunan fırınlar kadîmi vechile şehrî Müslim ve re‘âyâdan tâliblerine füruht olunarak semen-i misilleri düyûn-ı mîrîyyelerine mahsûben zahîre hazînesine teslîm ve ba‘dehû iktizâsı vechile tüccâr ve sâir kimesnelerin matlûbâtı istifâ kılınmak şartıyla zikrolunan fırınlar başka başka mezâda verilerek her biri ne mikdâra bâliğ olur ise taraf-ı mûmâ-ileyhden diğer tekārîr ve defâtir ile hâk-i pây-i devletlerine ifâde kılınarak ve kādı-i Dârü’l-hilâfe tarafından dahi taharrî olunarak her kim ziyâde verir ise ona i‘tâ olunmak ve şimdilik mezâda verilmek istid‘âsı meâlinde nâzır-ı mûmâ-ileyhin takdîm eylediği memhûr takrîri bâlâsına bu dâ‘îlerine hitâben zahîre nâzırı efendinin işbu takrîri mûcibince zikrolunan fırınlar efendi-i mûmâ-ileyh ma‘rifetiyle başka başka mezâda verilerek tâlibleri miyânında arttırılıp ne mikdâra karâr eder ise ve her kim ziyâde verir ise ona verilmek üzre iktizâ eden bahâsı ma‘rifet-i şer‘ ve efendi-i mûmâ-ileyh ma‘rifetiyle tahsîl olunmak üzre zahîre hazînesine teslîmi sûretinin istihsâline mübâderet eyeleyesin deyü unvânı sahh-ı âlî ile müveşşah sâdır olan fermân-ı âlîlerine imtisâlen nâzır-ı mûmâ-ileyh tarafından vekîl-i müsecceli habbâzân kethudâsı Mehmed Ağa b. Ali meclis-i şer‘-i <> enverde Bağdâdîzâde Şehrî İbrahim b. el-Hâc Emin nâm kimesne ile Serkiz v. Aleksan ve Dimitri v. Yorgi nâm zimmîler muvâcehelerinde bi’l-vekâle takrîr-i kelâm edip İstanbul’da Çatladıkapı civârında Çardaklı fırın demekle arîf beş horoslu bir kıt‘a habbâz fırını derûnunda mevcûde beyne’l-esnâf gedik ta‘bîr olunur yirmi re’s bargir ve sâir âlât-ı lâzıme-i mâ‘lûme Arnabud tâifesinden <> Selman ve Bâyezid nâm kimesnelerin yedlerinde mâlları olup ve mezbûrân bundan akdem ber-vech-i muharrer bâ-irâde-i seniyye vilâyetlerine i‘zâm ve der-dest olan defter mantûkunca merkūmânın cânib-i mîrîye zahîre bahâsından on altı bin dokuz yüz seksen yedi buçuk guruş ve tüccâra yirmi bin iki yüz altmış altı guruş deynleri olmağla sâdır olan fermân-ı âlî mûcibince bey‘i lâzım gelmeğin sâlifü’z-zikr âlât-ı lâzıme-i ma‘lûme olan yirmi re’s bargirin on re’s bargir hissesi mezbûr İbrahim üzerinde on sekiz bin altı yüz yirmi altı buçuk guruş on para ve beş re’s bargir hissesi mersûm Serkiz zimmî üzerinde dokuz bin üç yüz on üç guruş on beş para ve beş re’s bargir hissesi mesfûr Dimitri zimmî üzerinde kezâlik dokuz bin üç yüz on üç guruş on beş parada karâr ve ziyâde ile tâlib-i âharı olmayıp ve mebâliğ-i merkūme gedik-i mezkûrun el-yevm semen-i misli idüğü ihbâr olunmağla hâlâ ben âlât-ı lâzıme-i mezkûrenin on re’s bargir hissesini merkūm İbrahim meblağ-ı mezkûr on sekiz bin altı yüz yirmi altı buçuk guruş on paraya ve beş re’s bargir hissesini mersûm Serkiz zimmîye meblağ-ı mezbûr dokuz bin üç yüz on üç guruş on beş paraya ve beş re’s bargir hissesini dahi zimmî-i mesfûr Dimitri’ye meblağ-ı merkūm dokuz bin üç yüz on üç guruş on beş paraya bi’l-vekâle bey‘ ve teslîm ve semenleri olan cem‘an otuz yedi bin iki yüz elli üç buçuk guruşun dört bin guruşunu her biri hisselerine göre ber-vech-i peşîn ve mâ‘adâsı olan otuz üç bin iki yüz elli üç buçuk guruşunu dahi kezâlik her biri emsâli misillü zahîre hazînesine edâ etmek üzre bi’l-vekâle ihâle eylediğimde onlar dahi ber-minvâl-i muharrer [22a] iştirâ ve tesellüm ve ber-vech-i meşrûh semen-i mecmû‘-ı mezkûru hâlâ ve mukāssatan kabzına me’mûra teslîme ta‘ahhüd <> etmeleriyle fîmâ-ba‘d mârrü’l-beyân gedik âlâtı merkūmûnun vech-i meşrûh üzre iştirâken mâlları olmuşdur deyü ba‘de’t-takrîr ve’t-tasdîk sâlifü’z-zikr âlât-ı lâzımenin kayd-ı atîki kaleminden ref‘ ve terkīn ve mezbûrûn İbrahim ile Serkiz ve Dimitri zimmîlerin ber-minvâl-i muharrer isimlerine tashîhan kayd ile yedlerine sûret i‘tâsını mezbûrûn istid‘â ve istid‘âları şurût-ı nizâma muvâfık olduğunu hazır bi’l-meclis bi’l-cümle nizâm ustaları ihbâr ve inbâ eyledikleri İstanbul Mahkemesi’nden huzûr. Fî 25 Ra sene 1242