İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 158 Hüküm no: 103 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gedikpaşa’da Murad Ağa’nın mağazasına bitişik duvarın yıkılıp asıl şekliyle yeniden inşa edileceği Karababa zukāğında dîvâr keşfi Ma‘rûz Sâdır olan fermân-ı âlîlerine imtisâlen zikri câ’î husûsu mahâllinde lede’l-mu‘âyene keşf ü tahkīk için cânib-i şer‘-i mutahhardan me’zûnen irsâl olunan Kâtib Mehmed Hidâyetullâh Efendi dâ‘îleri hâssa mi‘mârı hulefâsından es-Seyyid Abdülkadir ve Abdullah Halîfeler ile nezâret-i dâ‘îlerinde âsûde evkāfdan Tersâne-i âmire emîni esbak Salih Efendi nâm sahibü’l-hayrın vakfı müsakkafâtından İstanbul’da Gedikpaşa kurbünde Emin Sinan mahallesinde Karababa zukāğı nâm mahâlde köşede vâki‘ fi’l-asl Hurşid Efendi Konağı demekle meşhûr konak arsasından müfrez münâza‘un-fîh olan ma‘lûmü’l-hudûd bir bâb muhterik menzil arsasına varıp huzûr-ı Müslimînde akd-i meclis-i şer‘-i nebevî ettikde arsa-i mezbûreye bâ-temessük-i mütevellî bi’l-icâreteyn mutasarrıf olan sahib-i arzuhâl Bağdâdî İsmail Ağa b. el-Hâc Osman nâm kimesne meclis-i ma‘kūd-ı mezkûrda yine vakf-ı mezbûrdan arsa-i mezkûre ittisâlinde kâin kezâlik ma‘lûmü’l-hudûd nâ-tamam bir bâb menzile bâ-temessük-i mütevellî bi’l-icâreteyn mutasarrıf olan derûn-ı arzuhâlde mezkûru’l-ism esirci Tamanlı el-Hâc Murad Ağa b. el-Hâc Mustafa nâm kimesne muvâcehesinde vakf-ı mezbûrun mütevellîsi es-Seyyid Ahmed Efendi b. es-Seyyid İbrahim hazır olduğu hâlde işbu derûnunda akd-i meclis-i şer‘-i âlî olunan arsa-i mezkûrenin zîr-i zemîninde kârgir mahzen ittisâlinde tarîk-ı âm tarafından mezbûr el-Hâc Murad Ağa’nın mağazasının kapısına müntehî mahalle kadar mi‘mârân-ı mezbûrân misâhalarıyla tûlen on üç zirâ‘ ve arzan an-asl on sekiz parmak taş dîvârı hedmle arzan on üç parmak olarak taş duvar binâ ve inşâ edip ol vechile zikrolunan mahzen dîvâr-ı mezkûra muttasıl olup kadîmi üzre arzan on sekiz parmak taş dîvâr binâ olunmadığı sûretde kemeri açılıp mahzen-i mezkûra mazarrâtı olduğu zâhir ve mütehakkık olmağla mazarrâtını def‘e tenbîh olunmak murâdımdır deyü bundan akdem da‘vâya tesâddî etmişdim el-hâletü hâzihî zikrolunan dîvârı mi‘mârân-ı mezbûrân misâhalarıyla kadden beş buçuk zirâ‘ olarak heyet-i aslîsi üzre mâlından teberru‘an li’l-vakf melez harçla taş dîvâr binâ ve inşâ etmek üzre ta‘ahhüd ben dahi ta‘ahhüdünü kabûl eyledim deyü takrîrini mezbûr el-Hâc Murad Ağa tasdîk ve bu vechile kat‘-ı münâza‘a eylediklerini kâtib-i merkūm dâ‘îleri mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri İstanbul Mahkemesi’nden huzûr. Fî 22 Ra sene 1242