İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 167 Hüküm no: 110 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Bâyezid mahallesinde yıkılmış ocak ve duvarı yeniden inşa meselesinden iki ailenin anlaşmazlığa düştükleri Sarı Bâyezid mahallesinde menzil ocağı keşfi ve ba‘dehû menzil-i mezkûru huzûr-ı şer‘de 4300 guruş bedel-i medfû‘a ferâğı Ma‘rûz Sâdır olan fermân-ı âlîlerine imtisâlen zikri câ’î husûsu mahâllinde lede’l-mu‘âyene keşf ve tahkīk için savb-ı şer‘-i enverden me’zûnen irsâl olunan Kâtib Mehmed Hidâyetullâh Efendi dâ‘îleri ve bi’l-ma‘iye rü’yete me’mûr Haremeyn-i şerîfeyn müfettişi mevâlî-i ızâmdan İstanbul pâyesiyle tekrîm buyrulan Emin Beyefendi-zâde fazîletlü Abdülkadir Beyefendi tarafından meb‘ûs Kâtib Mehmed Hamdi Efendi hâssa mi‘mârı hulefâsından es-Seyyid Mehmed Râşid ve Sâfî Mustafa Halîfeler ile Dârü’s-sa‘âdeti’ş-şerîfe ağası hazretleri nezâret-i aliyyelerinde âsûde evkāfdan ser-etıbbâ-i hâssa-i esbak Fenârîzâde Mustafa Feyzi Efendi Vakfı müsakkafâtından İstanbul’da Süleymâniye civârında Abacı Çeşmesi nâm mahâlde Sarı Bâyezid mahallesinde vâki‘ münâza‘un-fîh olan ma‘lûmü’l-hudûd bir bâb menzile varıp huzûr-ı Müslimînde akd-i meclis-i şer‘-i nebevî ettiklerinde menzil-i mezkûra bâ-temessük-i mütevellî bi’l-icâreteyn ber-vech-i iştirâk mutasarrıfları olan sahib-i arzuhâl İmâmeci Mehmed Ali Ağa b. İbrahim ile zevcesi mu‘arrefetü’z-zat Şerife Âişe bt. Abdullah nâm hatun meclis-i ma‘kūd-ı mezkûrda menzil-i mezkûr ittisâlinde yine vakf-ı mezbûrdan bir tarafdan vakf-ı âhardan Âişe Hatun menzili bir tarafdan yine vakf-ı âhardan silâhşorân-ı hâssadan Mehmed Ağa menzili ve bir tarafdan tarîk-ı âm ile mahdûd bir bâb menzile bâ-temessük-i mütevellî bi’l-icâreteyn bi’l-münâsafa iştirâken mutasarrıflar olan derûn-ı arzuhâlde mezkûru’l-ism Ahî Çelebi mahallesi imâmı es-Seyyid Mustafa Efendi b. es-Seyyid Osman ile kezâlik zâtı mu‘arrefe Şerife Ümmü Gülsüm bt. es-Seyyid Mehmed Emin nâm hatun muvâcehelerinde vakf-ı mezbûrun bi’l-meşrûta mütevellîsi Fâtıma Hanım tarafından mürsel câbî-i vakf Veliyüddin Efendi b. Mehmed hazır olduğu hâlde işbu derûnunda akd-i meclis-i şer‘-i âlî olunan menzili mezkûrumuzun matbah ocağı bundan akdem münhedim olup ve menzil-i mezkûrun zukāk kapısından ocağ-ı mehdûm-ı merkūma varınca mi‘mârân-ı mezbûrân misâhalarıyla tûlen on bir zirâ‘ ve kadden dört zirâ‘ altı parmak müşterek dolma dîvârımız inhidâma mâil olup mâlımızla binâ ve inşâ etmek murâd eylediğimizde zevcân-ı mezbûrân bize küllî mazarrâtı vardır diyerek mümâna‘at etmeleriyle mümâna‘atları men‘ ü def‘ olunmak matlûbumuzdur deyü bundan akdemce da‘vâya tesâddî ve ol vechile beynimizde münâza‘ât-ı kesîre cereyân etmişdi el-hâletü hâzihî zevcân-ı mezbûrân menzil-i mezkûru huzûr-ı şer‘de hüsn-i rızâ ve tayyib-i hâtırları ve ferâğ-ı mu‘teber-i kat‘î ile dört bin üç yüz guruş bedel-i medfû‘ ve makbûz-ı müstehlek mukābelesinde bana ferâğ ve tefvîz eylediklerinde ben dahi tefevvüz ve kabûl ve mezbûr Veliyüddin Efendi dahi tasarrufuma bi’t-tevliye ba‘de’l-izn ferâğ-ı mezkûrda şurût-ı müfside müdde‘âsına ve bedel-i müstehlek-i merkūmun istirdâdına müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt edip ol vechile menzil-i mezkûrda zevcân-ı mezbûrân es-Seyyid Mustafa Efendi ve Şerife Ümmü Gülsüm Hatun’un kat‘â alâka ve medhalleri olmayıp benim dâhil-i havza-i tasarrufum olmuşdur dediğini zevcân-ı mezbûrân tasdîk ve tahkīk eyledikleri İstanbul Mahkemesi’nden huzûr. Fî 29 Ra sene 1242