İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 168 Hüküm no: 111 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hocapaşa’da Fâtıma Hatun bt. Abdullah’ın, kendi evi ile Esma Hatun bt. Ebubekir’in evi arasındaki duvar üzerine kütük koymasının menedildiği Kârgir dîvâr üzerine cüzû‘ vaz‘ı keşfi Ma‘rûz Sâdır olan fermân-ı âlîlerine imtisâlen zikri câ’î husûsu mahâllinde ber-nehc-i şer‘î istimâ‘ ve fasl u hasm için savb-ı şer‘-i enverden me’zûnen irsâl olunan Kâtib es-Seyyid Salih Afîf Efendi dâ‘îleri bi’l-ma‘iye rü’yete me’mûr Haremeyn-i şerîfeyn müfettişi Emin Beyefendi-zâde fazîletlü Abdülkadir Beyefendi tarafından mürsel Kâtib Mehmed Hamdi Efendi ve hâssa mi‘mârı hulefâsından Mehmed Nuri ve es-Seyyid Mehmed Râşid Halîfeler ile İstanbul’da Hocapaşa kurbünde vâki‘ Küçük Ağa Hamamı demekle meşhûr bir kıt‘a yektâ hamama varıp huzûr-ı Müslimînde akd-i meclis-i şer‘-i şerîf ettiklerinde nezâret-i dâ‘îlerinde olan evkāfdan merhûm Karaki Hüseyin Çelebi Vakfı’ndan hamam-ı mezbûr ittisâlinde kâin bir bâb muhterik menzil arsasına bâ-temessük-i mütevellî bi’l-icâreteyn mutasarrıfe olan Esma Hatun bt. Ebîbekir’in zevci ve tarafından husûs-ı âtîde vekîl olduğu zâtını ârifân Mehmed Said Ağa b. İbrahim ve el-Hâc İbrahim Edhem Ağa b. el-Hâc Osman nâm kimesneler şehâdetleriyle sâbit olan İmâmeci el-Hâc Osman Ağa b. es-Seyyid İbrahim meclis-i ma‘kūd-ı mezkûrda Dârü’s-sa‘âdeti’ş-şerîfe ağası nezâretlerinde âsûde evkāfdan merhûm Abbas Ağa Vakfı’ndan hamam-ı mezkûra kezâlik bâ-temessük-i mütevellî bi’l-icâreteyn mutasarrıfe olan zâtı mu‘arrefe Fâtıma Hatun bt. Abdullah muvâcehesinde merkūm Hüseyin Çelebi Vakfı’nın mütevellîsi Âişe Hatun tarafından vekîl-i mürseli Mehmed Efendi ve mûmâ-ileyh Abbas Ağa Vakfı mütevellîsi Said Efendi tarafından mürsel vekîli Kasım Ağa hazır oldukları hâlde işbu mu‘âyene olunduğu üzre menzil-i mezkûr bağçesiyle hamam-ı mezbûr beynlerinde kâin kârgir dîvâr merkūm Hüseyin Çelebi Vakfı’ndan olarak müvekkilem mezbûre Esma Hatun’un menzili müştemilâtından ve üzerinde dahi kimesnenin cüzû‘u yoğiken ba‘de’l-harîk mezbûre Fâtıma Hatun dîvâr-ı mezkûr üzerine fuzûlî üç aded cüzû‘ vaz‘ ve ihdâs ve câmekân ebniyesini dahi itâle etmekle kat‘ ve heyet-i kadîmesine ircâ‘a mezbûre Fâtıma Hatun’a tenbîh olunmak matlûbumdur deyü da‘vâ ettikde ol dahi cevâbında husûs-ı mezkûru bi-tamamihî ba‘de’l-i‘tirâf beynleri ıslâh olunup mezbûre Fâtıma Hatun mi‘mârân-ı mezbûrân ta‘rîfleri üzre bir başından tûlen on dört parmak ve arzan on bir parmak ve bir başından dahi tûlen altı parmak ve arzan üç parmak olarak dîvâr-ı mezkûr üzerinden ebniyesini geri çekip akıntı ve nezâret misillü mazarrât ihdâs etmemeğe dahi [24b] ta‘ahhüd eylediğinde vekîl-i mezbûr dahi ta‘ahhüdünü kabûl ve bu vechile kat‘-ı nizâ‘ eylediklerini mevlânâ-yı mûmâ-ileyhimâ dâ‘îleri mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri İstanbul Mahkemesi’nden huzûr-ı âlîlerine i‘lâm olundu. Fî 24 Ra sene 1242