İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 169 Hüküm no: 112 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İrade gereğince sahipleri Arnavut olan Şeyh Ebulvefa fırınına devlet tarafından el konulup mezada verildiği Cânib-i mîrîden Şeyh Ebulvefâ fırını mübâya‘ası Zahîre nâzırı izzetlü Mehmed Ârif Efendi bendeleri Âsitâne-i sa‘âdet ve bilâd-ı selâsede vâki‘ Arnabud fırınlarının Müslim hamîrkâr ve hademe-i sâiresinin mukaddemce bâ-irâde-i seniyye yerlerine re‘âyâ ve kendileri mahallerine i‘zâm ve bu def‘a dahi lâzımü’l-huzûr-ı nâzır-ı mûmâ-ileyh nezdine celb ve navul kalemi kuyûduna mürâca‘at ve tatbîk ve kā‘ide-i mer‘iyye-i mîrîyye ve ticârete tevfîk olunarak zikrolunan fırınların derûnlarında mevcûd zehâir ve bargir ve hatab bahâları ve tablakâr ve sâir zimmetlerinde olan matlûbâtlarının ve anbâr-ı âmire mevcûdundan aldıkları zahîre bahâsından zahîre hazînesine ve tüccârdan aldıkları zahîre bahâsından tüccâra ve hatab ve saman ve sâir zimemâtlarının yegān yegān hesâbları rü’yet ve yerlerine şimdilik ikāmet sûretiyle re‘âyâdan habbâz ustası ik‘âd ve ikāmet ettirilmiş ve sâye-i veliyyü’n-ni‘amîde nân-ı azîz husûsunda ibâdullâha zarûret çektirilmemek husûsunun vesâili istihsâl olunmuş ise de müddet-i medîde emâneten idâresinde telefâtı mûcib ve bi’l-âhare zahîre hazînesine ve tüccâra zarar ve hasârı müstevcib olmağla zikrolunan fırınlar kadîmi vechile şehrî Müslim ve re‘âyâdan tâliblerine füruht olunarak semen-i misilleri düyûn-ı mîrîyyelerine mahsûben zahîre hazînesine teslîm ve ba‘dehû iktizâsı vechile tüccâr ve sâir kimesnelerin matlûbâtı istifâ kılınmak şartıyla zikrolunan fırınlar başka başka mezâda verilerek her biri ne mikdâra bâliğ olur ise taraf-ı mûmâ-ileyhden diğer tekārîr ve defâtir ile hâk-i pây-i devletlerine ifâde kılınarak ve kādı-i Dârü’l-hilâfe tarafından dahi taharrî olunarak her kim ziyâde verir ise ona i‘tâ olunmak ve şimdilik mezâda verilmek istid‘âsı meâlinde nâzır-ı mûmâ-ileyhin takdîm eylediği memhûr takrîri bâlâsına bu dâ‘îlerine hitâben zahîre nâzırı efendinin işbu takrîri mûcibince zikrolunan fırınlar efendi-i mûmâ-ileyh ma‘rifetiyle başka başka mezâda verilerek tâlibleri miyânında arttırılıp ne mikdâra karâr eder ise ve her kim ziyâde verir ise ona verilmek üzre iktizâ eden bahâsı ma‘rifet-i şer‘ ve efendi-i mûmâ-ileyh ma‘rifetiyle tahsîl olunmak üzre zahîre hazînesine teslîmi sûretinin istihsâline mübâderet eyleyesin deyü unvânı sahh-ı âlî ile müveşşah sâdır olan fermân-ı âlîlerine imtisâlen nâzır-ı mûmâ-ileyh tarafından vekîl-i müsecceli habbâzân kethudâsı Mehmed Ağa b. Ali meclis şer‘-i enverde Şehrî el-Hâc Musa ve karındaşı el-Hâc Emin b. el-Hâc İsmail ve es-Seyyid el-Hâc Edhem b. Mehmed Ârif nâm kimesneler muvâcehelerinde bi’l-vekâle takrîr-i kelâm edip İstanbul’da Şeyh Ebulvefâ nâm mahâlde vâki‘ dört horoslu bir kıt‘a habbâz fırını derûnunda mevcûde beyne’l-esnâf gedik ta‘bîr olunur on altı re’s bargir ve sâir âlât-ı lâzıme-i ma‘lûme Arnabud tâifesinden Ebûbekir ve Safer ve İsmail ve Halil ve Muslı nâm kimesnelerin yedlerinde mâlları olup mezbûrûn bundan akdem ber-vech-i muharrer bâ-irâde-i seniyye vilâyetlerine i‘zâm ve der-dest olan defter mantûkunca merkūmûnun cânib-i mîrîye zahîre bahâsından on bin yirmi iki guruş ve tüccâra dokuz bin iki yüz on beş guruş deynleri olmağla sâdır olan fermân-ı âlî mûcibince bey‘i lâzım gelmeğin sâlifü’z-zikr âlât-ı lâzıme-i ma‘lûmenin altı re’s bargir hissesi mezbûr el-Hâc Musa üzerinde yedi bin iki yüz on üç buçuk guruş on beş para ve altı re’s bargir hissesi karındaşı merkūm el-Hâc Emin üzerinde kezâlik yedi bin iki yüz on üç buçuk guruş on beş para ve dört re’s bargir hissesi dahi merkūm es-Seyyid el-Hâc Edhem üzerinde dört bin sekiz yüz dokuz guruş on parada karâr ve ziyâde ile tâlib-i âharı olmayıp ve mebâliğ-i merkūme hısas-ı merkūmenin el-yevm semen-i misli idüğü ihbâr olunmağla hâlâ ben âlât-ı lâzıme-i mezkûrenin altı re’s bargir hissesini mezbûr el-Hâc Musa’ya meblağ-ı mezkûr yedi bin iki yüz on üç buçuk guruş on beş paraya ve altı re’s bargir hissesini karındaşı mezbûr el-Hâc Emin’e kezâlik meblağ-ı mezbûr yedi bin iki yüz on üç buçuk guruş on beş para ve dört re’s bargir hissesini dahi mezbûr es-Seyyid el-Hâc Edhem’e meblağ-ı merkūm dört bin sekiz yüz dokuz guruş on paraya bi’l-vekâle bey‘ ve lâyıkıyla teslîm ve semenleri olan cem‘an on dokuz bin iki yüz otuz yedi guruşun iki bin dört yüz guruşunu hisselerine göre ber-vech-i peşîn ve mâ‘adâsı olan on altı bin sekiz yüz otuz yedi guruşunu dahi her biri bi-kadri’l-hısas senevî biner guruş vererek mukāssatan emsâli misillü zahîre hazînesine edâ etmek üzre bi’l-vekâle ihâle eylediğimde onlar dahi ber-minvâl-i muharrer iştirâ ve tesellüm ve ber-vech-i meşrûh semen-i mecmû‘-ı mezkûru hâlâ ve mukāssatan kabzına me’mûra teslîme ta‘ahhüd etmeleriyle fîmâ-ba‘d mârrü’l-beyân gedik âlâtı merkūmûnun vech-i meşrûh üzre iştirâken ve şâyi‘an mâlları olmuşdur deyü ba‘de’t-takrîr ve’t-tasdîk sâlifü’z-zikr gedik-i âlât-ı lâzımenin kayd-ı atîki kaleminden ref‘ ve terkīn ve mezbûr[û]n el-Hâc Musa ve karındaşı el-Hâc Emin ve es-Seyyid el-Hâc Edhem nâm kimesnelerin ber-minvâl-i muharrer isimlerine tashîhan kayd ile yedlerine sûret i‘tâsını mezbûrûn istid‘â ve istid‘âları şurût-ı nizâma muvâfık olduğunu hazır bi’l-meclis bi’l-cümle nizâm ustaları ihbâr ve inhâ eyledikleri İstanbul Mahkemesi’nden huzûr. Fî 25 Ra sene 1242