İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 171 Hüküm no: 113 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İrade gereğince sahipleri Arnavut olan Bıçakçılar fırınına devlet tarafından el konulup mezada verildiği Cânib-i mîrîden Bıçakçılar Fırını mübâya‘ası Ma‘rûz Zahîre nâzırı izzetlü Mehmed Ârif Efendi bendelerinin Âsitâne-i sa‘âdet ve bilâd-ı selâsede vâki‘ Arnabud habbâz fırınlarının Müslim hamîrkâr ve hademe-i sâiresinin mukaddemce bâ-irâde-i seniyye yerlerine re‘âyâ ve kendileri vilâyetlerine i‘zâm ve bu def‘a lâzımü’l-huzûr-ı nâzır-ı mûmâ-ileyh nezdine celb ve navul kalemi kuyûduna mürâca‘at ve tatbîk ve kā‘ide-i mer‘iyye-i mîrîyye ve ticârete tevfîk olunarak zikrolunan fırınların derûnlarında mevcûde zehâir ve bargir ve hatab bahâları ve tablakâr ve sâiri zimmetlerinde olan matlûbâtlarının ve anbâr-ı âmire mevcûdundan aldıkları zahîre bahâsından zahîre hazînesine ve tüccârdan aldıkları zahîre bahâsından tüccâra ve hatab ve saman ve sâir zimemâtlarının yegān yegān hesâbları rü’yet ve yerlerine şimdilik ikāmet sûretiyle re‘âyâdan habbâz ustaları ikāmet ettirilmiş ve sâye-i veliyyü’n-ni‘amîde nân-ı azîz husûsunda ibâdullâha zarûret çektirilmemek husûsunun vesâili istihsâl olunmuş ise de müddet-i medîde emâneten idâresinde telefâtı mûcib ve bi’l-âhare zahîre hazînesine ve tüccâra zarar ve hasârı müstevcib olmağla zikrolunan fırınlar kadîmi vechile şehrî Müslim ve re‘âyâdan tâliblerine füruht olunarak semen-i misilleri düyûn-ı mîrîyyelerine mahsûben zahîre hazînesine teslîm ve ba‘dehû iktizâsı vechile tüccâr ve sâir kimesnelerin matlûbâtı istifâ kılınmak şartıyla zikrolunan fırınlar başka başka mezâda verilerek her biri ne mikdâra resîde olur ise taraf-ı mûmâ-ileyhden diğer tekārîr ve defâtir ile hâk-i pây-i devletlerine ifâde kılınarak ve kādı-i Dârü’l-hilâfe tarafından dahi taharrî olunarak her kim ziyâde verir ise ona i‘tâ olunmak ve şimdilik mezâda verilmek istid‘âsı meâlinde nâzır-ı mûmâ-ileyhin takdîm eylediği memhûr takrîri bâlâsına bu dâ‘îlerine hitâben zahîre nâzırı [25a] efendinin işbu takrîri mûcibince zikrolunan fırınlar efendi-i mûmâ-ileyh ma‘rifetleriyle başka başka mezâda verilerek tâlibleri miyânında arttırılıp ne mikdâra karâr eder ise ve her kim ziyâde verir ise ona verilmek üzre iktizâ eden bahâsı ma‘rifet-i şer‘ ve efendi-i mûmâ-ileyh ma‘rifetiyle tahsîl ve mevkūfen zahîren hazînesinde hıfz olunmak ve ba‘dehû düyûn-ı mîrîyye ve tüccâr ve sâire olan düyûnları iktizâsı vechile tanzîm kılınmak üzre zahîre hazînesine teslîmi sûretinin istihsâline mübâderet eyleyesin deyü musahhah sâdır olan fermân-ı âlîlerine imtisâlen nâzır-ı mûmâ-ileyhin vekîl-i şer‘îsi habbâzân kethudâsı Mehmed Ağa b. Ali meclis-i şer‘-i münîrde Şehrî Şideri v. Mihal ve Yorgi v. Dimitri ve diğer Yorgi v. Nikola ve Corci v. Atam nâm zimmîler muvâcehelerinde zikrolunan fırınlardan İstanbul’da Bıçakçılar nâm mahâlde vâki‘ Başmuhâsebe’de mukayyed ve şurût-ı nizâma dâhil beş horoslu bir kıt‘a habbâz fırını derûnunda mevcûde beyne’l-esnâf gedik ta‘bîr olunur yirmi re’s bargir ve sâir âlât-ı lâzıme-i ma‘lûmeye bi’l-iştirâk mâlikleri olan Arnavud tâifesinden ma‘lûmü’l-esâmî kesân bundan akdem ber-vech-i muharrer bâ-irâde-i seniyye vilâyetlerine i‘zâm ve der-dest olan defter mantûkunca merkūmûnun cânib-i mîrîye on dokuz bin on bir guruş ve tüccâra on bin yedi yüz yirmi yedi buçuk guruş deynleri olup sâdır olan fermân-ı âlî mûcibince bey‘i lâzım gelmeğin zikrolunan gediğin lede’l-müzâyede iki buçuk bargiri müşteri-i mersûmûndan Şideri ve beş bargiri Yorgi ve iki buçuk bargiri diğer Yorgi ve on bargiri Corci’nin olmak üzre cem‘an yirmi dokuz bin yedi yüz otuz sekiz buçuk guruşda mersûmûnun üzerlerinde karâr ve ziyâde ile tâlib-i âharı olmayıp ve meblağ-ı merkūm gedik-i mezkûrun el-yevm semen-i misli idüğü ihbâr olunmağla hâlâ ben zikrolunan gediği meblağ-ı merkūm yirmi dokuz bin yedi yüz otuz sekiz buçuk guruşa mesfûrûna bi’l-vekâle bey‘ ve lâyıkıyla teslîm ve semen-i mezkûrun iki bin beş yüz guruşunu bi-kadri’l-hısas ber-vech-i peşîn ve mâ‘adâsı olan yirmi yedi bin iki yüz otuz sekiz buçuk guruşunu senevî hisselerine göre beynlerinde bi’l-iktisâm cem‘ edip yalnız cümlesi bin guruş vererek mukāssatan emsâli misillü zahîre hazînesine edâ etmek üzre ihâle eylediğimde onlar dahi ber-minvâl-i muharrer iştirâ ve tesellüm ve vech-i meşrûh üzre semen-i mezkûru hâlâ ve mukāssatan kabzına me’mûra teslîme ta‘ahhüd etmeleriyle fîmâ-ba‘d zikrolunan gedik mersûmûn Şideri ve Yorgi ve diğer Yorgi ve Corci’nin ber-vech-i muharrer tasarruflarında olmuşdur deyü ba‘de’t-takrîr ve’t-tasdîk mârrü’l-beyân gediğin kayd-ı atîki kaleminden ref‘ ve terkīn ve kendilerinin isimlerine tashîhan kayd ile yedlerine bir kıt‘a sûret i‘tâsını müşterûn-ı mersûmûn istid‘â ve istid‘âları şurût-ı nizâma muvâfık olduğunu hazır bi’l-meclis ve mazbûtü’l-esâmî nizâm ustaları ihbâr ve inhâ eyledikleri İstanbul Mahkemesi’nden huzûr. Fî 25 Ra sene 1242