Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 363 Hüküm no: 410 Orijinal metin no: [65a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Çelebi b. Mustafa’nın terekesinin vârisleri arasında paylaşılması Mahmiye-i İstanbul’da Çelebioğlu mahallesi sükkânından iken bundan akdem vefât eden nakkāş Hasan Çelebi b. Mustafa nâm kimesnenin verâseti zevce-i metrûkesi Kerime bt. Hızır nâm hâtun ile sulbiye kebîre kızı Emetullah nâm hâtuna münhasıra olup kable’l-kısme mezbûre Emetullah dahi fevt olup verâseti zevc-i metrûkü el-Hâc Osman b. Mehmed ile vâlidesi mezbûre Kerime’ye münhasıra ve tashîh-i mes’eleleri bi tarîki’l-münâsahati’ş-şer‘iyye on altı sehimden olup sihâm-ı mezbûreden yedi sehim merkūm el-Hâc Osman ve dokuz sehmi merkūme Kerime’ye isâbet eylediği şer‘an sâbit ve müte‘ayyin oldukdan sonra mezbûr el-Hâc Osman meclis-i şer‘-i şerîf-i enverde merkūme Kerime Hâtun mahzarında ikrâr-ı tâm ve takrîr-i kelâm edip müteveffâ-yı evvel-i mezbûrun terekesinden olup mahalle-i mezbûrede vâki‘ lede’l-ahâlî ma‘lûmü’l-hudûd mülk menzilden mâ‘adâ müteveffiyân-ı mezbûrânın cemî‘ terekelerinden her birimiz hesâb-ı mezkûr üzre kendiye isâbet eden hisse-i şer‘iyye-i mezbûrumuzu bi’t-tamâm ahz u kabz edip ve menzil-i mezbûrdan bana isâbet [eden] yedi sehim hisse-i şer‘iyyemi merkūme Kerime’ye otuz altı bin akçeye bey‘ ve temlîk ve semen-i mezbûrun altı bin akçesini ahz u kabz edip otuz bin akçesi bâkī kalmışdı hâlâ mezbûre Kerime meblağ-ı bâkī-i mezbûr otuz bin akçeyi dahi bana edâ ve teslîm ben dahi bi’t-tamâm ahz u kabz ve istîfâ edip müteveffân-ı mezbûrânın kalîl ü kesîr ve celîl ü hakīr bi’l-cümle ism-i mâl [ıtlâk] olunur terekelerinden hisse-i şer‘iyyemize ve târih-i kitâba gelince beynimizde cereyân eden sâir ahz u i‘tâya ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan her birimiz âharın zimmetini ibrâ-i âm ve kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Nasuhi Efendi b. Mehmed el-İmâm, Mustafa Efendi b. Musli, Musa Çelebi b. Ahmed, Abdullah Efendi, Hasan Çelebi b. Abdullah, el-Hâc Mustafa b. Abdullah, Mustafa Efendi b. Bayram Çelebi.