İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 172 Hüküm no: 114 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakut bt. Mankasar’ın, kazzaz gediğini Avanes v. Mankasar’a sattığı Kazzâz gediği mübâya‘ası ve ismine kaydı Yakut binti’l-hâlik Kazzâzcı Mankasar Nasrâniyenin sadrî kebîr oğlu ve tarafından husûs-ı âtîde ikrâra vekîl olduğu şahs-ı mesfûreyi bilir Andon v. Kegofilos ve Toros v. Setrak nâm zimmîler şehâdetleriyle ber-nehc-i şer‘î sâbit olan Mardiros v. Karabet zimmî meclis-i şer‘-i münîrde kazzâz esnâfından Avanes v. Mankasar zimmî muvâcehesinde esnâf-ı merkūme kethudâsı Abdüllatif Ağa hazır olduğu hâlde bi’l-vekâle takrîr-i kelâm edip müvekkilem anam mesfûre Yakut Nasrâniye İstanbul’da Çarşı-yı Kebîr’de Du‘â Meydânı kurbünde Yağlıkçılar köşesinde vâki‘ bir tarafdan Yağlıkçı Hüseyin Ağa dükkânı ve bir tarafdan Kazzâz Hristo zimmî dükkânı ile mahdûd bir kepenkli kazzâz dükkânı derûnunda mevcûde Başmuhâsebe’de mukayyed şurût-ı nizâma dâhil olarak ırsen ve şirâen bâ-sûret mâlike olduğum bir gedik i‘tibâr olunan âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin üç bin guruş semen-i makbûza mersûm Avanes zimmîye bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl edip bey‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik fîmâ-ba‘d âlât-ı gedik-i mezkûr mesfûr Avanes zimmînin mülk-i müşterâsı ve hakk-ı sırfı olup benim kat‘â alâkam kalmamışdır deyü ba‘de’l-ikrâr ve’t-tasdîk gedik-i mezkûrun kayd-ı evveli mesfûre Yakut Nasrâniye üzerinden ref‘ ve terkīn ve mersûm Avanes zimmî ismine tashîhan kayd ile yedine sûret i‘tâsını istid‘â eyledikleri İstanbul Mahkemesi’nden huzûr. Fî 24 Ra sene 1242