İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 176 Hüküm no: 117 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Ebubekir’in, Cumartesi Pazarı’nda daha önce ev bulunan arsaya ahır inşa etmesinin men’i Cumartesi Pazarı’nda öküz ahırı keşfi Sâdır olan fermân-ı âlîlerine imtisâlen zikri câ’î husûsun lede’l-mu‘âyene mahâllinde keşf ve tahrîri’çün cânib-i şerî‘at-i garrâdan me’zûnen irsâl [olunan] Kâtib Hasan Şükrü Efendi dâ‘îleri hâssa mi‘mârı hulefâsından es-Seyyid Abdülkadir ve Ahmed Râşid Halîfeler ile nezâret-i dâ‘îlerinde olan evkāfdan ashâb-ı hayrâtdan merhûm Nişancı Abdülkerim Efendi Vakfı müsakkafâtından İstanbul’da Cumartesi Pazarı kurbünde Hoca Üveys mahallesinde İmâm zukāğında vâki‘ bir tarafdan Eskici Mustafa menzili ve ba‘zan bağçesi ve bir tarafdan kuzâtdan Abdülgani Efendi bağçesi ve bir tarafdan Zeliha Hatun bağçesi ve bir tarafdan tarîk-ı âm ile mahdûd mi‘mârân-ı mezbûrân misâhalarıyla terbî‘an doksan dokuz zirâ‘ arsa üzerine mebnî nâ-tamam bir bâb öküz ahırına varıp huzûr-ı Müslimînde akd-i meclis-i şer‘-i nebevî ettikde ashâb-ı arzuhâl mahalle-i mezbûrenin imâm vekîli Halil Efendi b. İsmail ve ahâlîsinden kuzâtdan el-Hâc Salih Efendi b. Hüseyin ve yine kuzâtdan Ahmed Necib Efendi b. Lütfullah ve Oturakçı es-Seyyid Feyzullah Ağa b. Mehmed ve Sarrâc es-Seyyid Ali Ağa b. Mehmed ve Eskici Mustafa b. Abdülkadir ve Bakkal es-Seyyid İsmail b. İbrahim ve Humbaracı es-Seyyid İbrahim b. Hamza nâm kimesneler meclis-i ma‘kūd-ı mezkûrda ahır-ı mezkûra bâ-temessük-i mütevellî bi’l-icâreteyn mutasarrıf olan derûn-ı arzuhâlde mezkûru’l-ism Çukadâr es-Seyyid Mustafa Ağa b. Ebîbekir nâm kimesne muvâcehesinde vakf-ı mezbûrun mütevellîsi müderrisîn-i kirâmdan Ahmed Şemseddin Efendi b. Abdullah nâm kimesne tarafından vekîl-i müseccel-i şer‘îsi câbî-i vakf es-Seyyid Hüseyin Efendi b. Mehmed hazır olduğu hâlde mezbûr es-Seyyid Mustafa Ağa ahır-ı mezkûru fi’l-asl menzil arsası olduğu hâlde bundan akdemce mutasarrıfesinden tefevvüz ile ke’l-evvel menzil binâ etmeyip mütevellî-i müvekkil-i mûmâ-ileyhin izinsiz ahır binâ ve inşâsına mübâşeret-birle temellerini vaz‘ edip lâkin ahır-ı mezkûr ba‘de’t-tekmîl mezbûr es-Seyyid Mustafa Ağa derûnuna muhâtaralı olan saman ve otluk vaz‘ edeceği dahi meczûmumuz olduğuna binâen ma‘azallâhu te‘âlâ harîk zuhûr eder ise cümlemizin perâkende ve perîşân olmamıza bâ‘is ve bâdî olacağı bedîhî ve âşikâr olmağla bu sûretde merkūm es-Seyyid Mustafa Ağa zikrolunan ahır inşâsından ferâğ-birle ke’l-evvel menzil binâ ve inşâ etmek üzre mezbûr es-Seyyid Mustafa Ağa’ya tenbîh olunmak matlûbumuzdur deyü mütevellî vekîli hâzır-ı mezbûrun tasdîkiyle da‘vâ ettiklerinde ol dahi cevâbında kazıyye minvâl-i meşrûh üzre olduğunu ikrâr ve i‘tirâf ve zikrolunan ahırı tavuk kümesine tebdîl ile derûnuna kat‘â saman ve otluk vaz‘ etmemeğe ta‘ahhüd eylediğinde ve ahâlî ve mütevellî vekîli merkūmûndan her biri râzılar olup bu vechile kat‘-ı nizâ‘ eylediklerini kâtib-i merkūm mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr. Fî 15 Ra sene 1242 [Beyaz Beyaz]