İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 177 Hüküm no: 118 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İrade gereğince sahipleri Arnavut olan Çukurçeşme’deki fırına devlet tarafından el konulup mezada verildiği Cânib-i mîrîden Çukurçeşme’de habbâz fırını mübâya‘ası Ma‘rûz Zahîre nâzırı izzetlü Mehmed Ârif Efendi bendeleri Âsitâne-i sa‘âdet ve bilâd-ı selâsede vâki‘ Arnabud fırınlarının Müslim hamîrkâr ve hademe-i sâiresinin mukaddemce bâ-irâde-i seniyye yerlerine re‘âyâ ve kendileri mahallerine i‘zâm ve bu def‘a dahi lâzımü’l-huzûr-ı nâzır-ı mûmâ-ileyh nezdine celb ve navul kalemi kuyûduna mürâca‘at ve tatbîk ve kā‘ide-i mer‘iyye-i mîrîyye ve ticârete tevfîk olunarak zikrolunan fırınların derûnlarında mevcûde zehâir ve bargir ve hatab bahâları ve tablakâr ve sâir zimmetlerinde olan matlûbâtlarının anbâr-ı âmire mevcûdundan aldıkları zahîre bahâsından zahîre hazînesine ve tüccârdan aldıkları zahîre bahâsından tüccâra ve hatab ve saman ve sâir zimemâtlarının yegān yegān hesâbları rü’yet ve yerlerine şimdilik ikāmet sûretiyle re‘âyâdan habbâz ustası ik‘âd ve ikāmet ettirilmiş sâye-i veliyyü’n-ni‘amîde nân-ı azîz husûsunda ibâdullâha zarûret çektirilmemek husûsunun vesâili istihsâl olunmuş ise de müddet-i medîde emâneten idâresinde telefâtı mûcib ve bi’l-âhare zahîre hazînesine ve tüccâra zarar ve hasârı müstevcib olmağla zikrolunan fırınlar kadîmi vechile şehrî Müslim ve re‘âyâdan tâliblerine füruht olunarak semen-i misilleri düyûn-ı mîrîyyelerine mahsûben zahîre hazînesine teslîm ve ba‘dehû iktizâsı vechile tüccâr ve sâir kimesnelerin matlûbâtı istifâ kılınmak şartıyla zikrolunan fırınlar başka başka mezâda verilerek her biri ne mikdâra resîde olur ise taraf-ı mûmâ-ileyhden diğer tekārîr ve defâtir ile hâk-i pây-i devletlerine ifâde kılınarak ve kādı-i Dârü’l-hilâfe tarafından dahi taharrî olunarak her kim ziyâde verir ise ona i‘tâ olunmak ve şimdilik mezâda verilmek istid‘âsı meâlinde nâzır-ı mûmâ-ileyhin takdîm eylediği memhûr takrîri bâlâsına bu dâ‘îlerine hitâben zahîre nâzırı efendinin işbu takrîri mûcibince zikrolunan fırınlar efendi-i mûmâ-ileyh ma‘rifetiyle başka başka mezâda verilerek tâlibleri miyânında arttırılıp ne mikdâra karâr eder ise ve her kim ziyâde verir ise ona verilmek üzre iktizâ eden bahâsı ma‘rifet-i şer‘ ve efendi-i mûmâ-ileyh ma‘rifetiyle tahsîl olunmak üzre zahîre hazînesine teslîmi sûretinin istihsâline mübâderet eyleyesin deyü unvânı sahh-ı âlî ile müveşşah sâdır olan fermân-ı âlîlerine imtisâlen nâzır-ı mûmâ-ileyh tarafından vekîl-i müsecceli habbâzân kethudâsı Mehmed Ağa b. Ali meclis-i şer‘-i enverde Şehrî Ahmed b. Abdullah nâm kimesne ile Yani v. Atam ve Pandeli v. Yorgi ve Mihal v. Kanbur ve diğer Yani v. Andon ve Yorgi v. Manol nâm zimmîler muvâcehelerinde bi’l-vekâle takrîr-i kelâm edip İstanbul’da Çukurçeşme’de vâki‘ beş horoslu bir kıt‘a habbâz fırını derûnunda mevcûde beyne’l-esnâf gedik ta‘bîr olunur yirmi re’s bargir ve sâir âlât-ı lâzıme-i ma‘lûme Arnabud tâifesinden ma‘lûmü’l-esâmî kimesnelerin yedlerinde mâlları olup mezbûrûn bundan akdem ber-vech-i muharrer bâ-irâde-i seniyye vilâyetlerine i‘zâm ve der-dest olan defter mantûkunca merkūmûnun cânib-i mîrîye zahîre bahâsından otuz bir bin iki yüz elli bir buçuk guruş ve tüccâra on bin dört yüz yetmiş dört guruş deynleri olmağla sâdır olan fermân-ı âlî mûcibince bey‘i lâzım gelmeğin sâlifü’z-zikr âlât-ı lâzıme-i ma‘lûmenin altı re’s bargir hissesi <> mezbûr Ahmed üzerinde on iki bin beş yüz on yedi buçuk guruş altı parada ve üç buçuk bargir hissesi mersûm Yani zimmî üzerinde yedi bin üç yüz bir buçuk guruş on sekiz buçuk parada ve iki re’s bargir hissesi mesfûr Pandeli zimmî üzerinde dört bin yüz yetmiş iki buçuk guruş iki parada ve iki re’s bargir hissesi mersûm Mihal zimmî üzerinde kezâlik dört bin yüz yetmiş iki buçuk guruş iki parada ve nısf bargir hissesi mersûm diğer Yani zimmî üzerinde bin kırk üç guruş beş buçuk parada ve altı re’s bargir hissesi mesfûr Yorgi zimmî üzerinde on iki bin beş yüz on yedi buçuk guruş altı parada karâr ve ziyâde ile tâlib-i âharı olmayıp ve mebâliğ-i mezkûre hısas-ı merkūmenin el-yevm semen-i misilleri idüğü ihbâr olunmağla hâlâ ben âlât-ı lâzıme-i mezkûrenin altı re’s bargir hissesini mezbûr Ahmed’e meblağ-ı merkūm on iki bin beş yüz on yedi buçuk guruş altı paraya ve üç buçuk bargir hissesini mersûm Yani zimmîye meblağ-ı mezkûr yedi bin üç yüz bir buçuk guruş on sekiz buçuk paraya ve iki re’s bargir hissesini meblağ-ı mezbûr dört bin yüz yetmiş iki buçuk guruş iki paraya mesfûr Pandeli zimmîye ve yine iki re’s bargir hissesini dahi mersûm Mihal zimmîye kezâlik dört bin yüz yetmiş iki buçuk guruş iki paraya ve nısf bargir hissesini mersûm diğer Yani zimmîye meblağ-ı mezkûr bin kırk üç guruş beş buçuk paraya ve altı re’s bargir hissesini dahi mesfûr Yorgi zimmîye meblağ-ı mezkûr on iki bin beş yüz on yedi buçuk guruş altı paraya bi’l-vekâle bey‘ ve lâyıkıyla teslîm ve semenleri olan cem‘an kırk bir bin yedi yüz yirmi beş buçuk guruşun iki bin beş yüz guruşu her biri bi-kadri’l-hısas ber-vech-i peşîn ve mâ‘adâsını dahi kezâlik her biri bi-kadri’l-hısas senevî biner guruş vererek mukāssatan emsâli misillü zahîre hazînesine edâ etmek üzre bi’l-vekâle ihâle eylediğimde onlar dahi ber-minvâl-i muharrer iştirâ ve tesellüm ve ber-vech-i meşrûh semen-i mecmû‘-ı mezkûru hâlâ ve mukāssatan kabzına me’mûra teslîme ta‘ahhüd etmeleriyle fîmâ-ba‘d mârrü’l-beyân gedik âlâtı merkūmûnun vech-i meşrûh üzre iştirâken ve şâyi‘an mâlları olmuşdur deyü ba‘de’t-takrîr ve’t-tasdîk sâlifü’z-zikr âlât-ı lâzımenin kayd-ı atîki kaleminden ref‘ ve terkīn ve mezbûrun Ahmed ile Yani ve Pandeli <> ve Mihal ve diğer Yani ve Yorgi zimmîlerin ber-minvâl-i muharrer isimlerine tashîhan kayd ile yedlerine sûret i‘tâsını mezbûrûn istid‘â ve istid‘âları şurût-ı nizâma muvâfık olduğunu hazır bi’l-meclis bi’l-cümle nizâm ustaları ihbâr ve inhâ eyledikleri İstanbul Mahkemesi’nden huzûr. Fî 29 Ra sene 1242