İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 179 Hüküm no: 119 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma adlı küçük kızın, vasîsi aracılığı ile Kilid Hanı’ndaki odadaki hakkını Hamparsom v. Kabril’e devrettiği Kilid Hânı derûnunda oda ferâğı Ma‘rûz Dârü’s-sa‘âdeti’ş-şerîfe ağası hazretleri nezâretlerinde âsûde evkāfdan sahibü’l-hayrât vezîriazam-ı esbak Pîr[î] Paşa merhûhumun vakf-ı şerîfi müsakkafâtından zikri âtî odanın altı sehm i‘tibâriyle bâ-temessükât-ı mütevellî bi’l-icâreteyn mutasarrıflarından bir sehmine mutasarrıf olan derûn-ı arzuhâlde mezkûru’l-ism es-Seyyid el-Hâc Ali Ağa b. Veliyüddin nâm kimesne kendi nefsinden asâleten ve bir sehm hisse-i şâyi‘asına mutasarrıf olan dergâh-ı mu‘allâ kapıcıbaşılarından el-Hâc Mehmed Şerif Ağa b. Abdullah Ağa tarafından husûs-ı âti’l-beyânda Hasan Ağa b. İbrahim ve Hâfız Ali Ağa b. Abdülkerim nâm kimesneler şehâdetleriyle vekîl-i sâbitü’l-vekâlesi ve bir sehm hisse-i şâyi‘asına mutasarrıf li-ebeveyn er karındaşı es-Seyyid el-Hâc Halil Ağa ibnü’l-mezbûr Veliyüddin nâm müteveffânın sulbî kebîr oğlu olup mahrûse-i Bursa’da sâkin es-Seyyid el-Hâc Ömer Ağa tarafından husûs-ı âtîde Bodrum Hânı sükkânından Bezzâz Mehmed Rüstem Ağa b. Abdullah ve Bezzâz el-Hâc Mehmed Emin Efendi b. Abdullah nâm kimesneler şehâdetleriyle kezâlik sâbitü’l-vekâle vekîli olmağla dükkâna ve bir sehm hisse-i şâyi‘asına mutasarrıfe olan karındaş-ı müteveffâ-yı mezbûrun sulbiye kızı Şerife Fâtıma nâm sagīrenin tesviye-i emrine bâ-hüccet-i şer‘iyye vasîyy-i mansûbesi olmağla vesâyeten ve bir sehm hisse-i şâyi‘asına mutasarrıf olan kendi nefsinden asîl ve li-ebeveyn er karındaşı olup kezâlik bir sehm hisse-i şâyi‘asına mutasarrıf olan Mustafa Memiş Ağa b. el-Hâc Mehmed tarafından husûs-ı <> âtîde vekîl-i müseccel-i şer‘îsi Mehmed Sâlim Ağa nâm kimesne hazır olduğu hâlde Haremeyn-i şerîfeyn müfettişi olup İstanbul pâyesiyle tekrîm buyrulan Emin Beyefendi-zâde fazîletlü mîr Abdülkadir Efendi dâ‘îleriyle evvelen Çarşamba günü Arz Odası’nda huzûr-ı fâizü’n-nûr-ı vekâlet-penâhîlerinde ve ba‘dehû dâ‘îhânelerinde müfettiş-i mûmâ-ileyh tarafından meb‘ûs Kâtib es-Seyyid Mehmed Ârif Efendi ma‘iyetiyle [26b] akd olunan meclis-i şer‘-i şerîf-i enverde sahib-i arzuhâl Dülbendci Hamparsom v. Kapril nâm zimmî muvâcehesinde İstanbul’da Mercan Çarşısı kurbünde Kilid Hânı derûnunda tabaka-i süflâda kapıdan girerken sağ tarafda vâki‘ ikinci bir bâb oda benimle asîl-i hazır ve müvekkillerimiz mezbûrûn ve vasîsi olduğum sagīre-i mezbûrenin ber-i‘tibâr-ı merkūm iştirâken ve şâyi‘an bi’l-icâreteyn taht-ı tasarrufumuzda ve mesfûr Hamparsom zimmî dahi oda-i mezkûr derûnunda şehriye üçer guruş kirâ tesmiyesiyle müşâhereten müste’cirimiz olup lâkin işbu târih-i i‘lâm-ı şehrî gāyetine izâfetle benimle hâzır-ı asîl ve vekîl-i merkūmûn her birimiz bi’l-asâle ve bi’l-vekâle ve bi’l-vesâye fesh-i akd-i icâre etmemizle oda-i mezkûru gāyet-i şehr-i merkūmda tahliye ve bize teslîme mersûm Hamparsom zimmîye tenbîh olunmak bi’l-asâle ve bi’l-vekâle ve bi’l-vesâye matlûbumuzdur deyü vakf-ı sadr-ı müşârün-ileyhin bi’l-meşrûta mütevelliyesi Şerife Fâtıma Hanım bt. Üzeyr Bey tarafından vekîl-i müsecceli hazır bi’l-meclis câbî-i vakf Mehmed Emin Ağa b. Ahmed’in tasdîkiyle da‘vâ ve zimmî-i mersûm dahi cevâbında oda-i mezkûr dülbendci esnâfının ber-mûcib-i emr-i âlî-şân yüz altmış aded şurûtlu gediklerine dâhil olarak derûnunda olan gediği dahi mâlım olmağla hurûcdan imtinâ‘ ve ol vechile beynimizde münâza‘ât-ı kesîre vukū‘ bulmuşdu el-hâletü hâzihî ben ve hâzır-ı asîl ve vekîl-i merkūm Mehmed Sâlim Ağa oda-i mezkûrun mecmû‘unu el-yevm bedel-i mislinden ezyed ve evfer olduğu bi’l-ihbâr lede’ş-şer‘i’l-enver zâhir ve mütehakkık olan iki bin guruş bedel mukābelesiyle mersûm Hamparsom zimmîye bi’l-asâle ve bi’l-vekâle ve vasîsi olduğum sagīre-i mezbûrenin hissesini dahi âhara ferâğa kıbel-i şer‘den bâ-hüccet-i şer‘iyye me’zûn olduğuma binâen bi’l-vesâye hüsn-i rızâ ve tayyib-i hâtırımız ve ferâğ-ı mu‘teber-i kat‘î ile bâ-re’y-i mütevellî ferâğ ve tefvîz ve teslîm eylediğimizde ol dahi tefevvüz ve tesellüm ve kabûl ve bedel-i mezkûr iki bin guruşu benimle hâzır-ı asîl ve vekîl-i merkūma def‘ ü teslîm biz dahi yedinden tamamen ve kâmilen bi’l-asâle ve bi’l-vekâle ve bi’l-vesâye ahz ü kabz ve sagīre-i mezbûrenin bir sehm hissesine isâbet eden üç yüz otuz üç guruş kırk akçeyi defter-i kassâmına idhâl etmemle mâ‘adâsı olan bin altı yüz altmış altı guruş seksen akçeyi dahi asîl-i hazır ve müvekkillerimiz mezbûrûndan her birimiz bi-kadri’l-hısas beynimizde iktisâm ederek zimmî-i mesfûrun emriyle umûrumuza sarfla istihlâk etmemizle ba‘de’l-yevm oda-i mezkûrun mecmû‘u mersûm Hamparsom zimmînin dâhil-i havza-i tasarrufu ve hakk-ı müfevvazı olup benimle hâzır-ı asîl ve müvekillerimiz mezbûrûn ve sagīre-i merkūmenin kat‘â alâka ve medhalleri kalmamağla bi’l-cümle husûs-ı mezkûra ve ferâğ-ı merkūmda şurût-ı müfside müdde‘âsına ve bedel-i mezkûrun adem ve istifâsına müte‘allika âmme-i da‘vâdan benimle hâzır-ı asîl ve vekîl-i merkūmdan her birimiz mesfûr Hamparsom zimmînin zimmetini ancak bi’l-asâle ve bi’l-vekâle ol dahi kezâlik husûs-ı mezkûra ve ferâğ-ı mezkûrda şurût-ı müfside müdde‘âsına ve bedel-i müstehlek-i merkūmun istirdâdına müte‘allika âmme-i da‘vâdan benimle hâzır-ı asîl ve müvekkilerimiz mezbûrûndan her birimizin zimmetlerini bi’l-asâle ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın asâleten ve vekâleten ibrâsını kabûl edip bi’l-vesâye dahi kat‘â da‘vâ ve nizâ‘ ve husûmetim yokdur deyü mukırr-ı asîl ve vekîl ve vasîyy-i merkūm es-Seyyid el-Hâc Ali Ağa’nın bi’l-cümle takrîr-i meşrûhunu hâzırân-ı asîl ve vekîl Mehmed Sâlim Ağa ve Câbî Mehmed Emin Ağa ile mersûm Hamparsom zimmîden her biri tahkīk ve tasdîk eyledikleri İstanbul Mahkemesi’nden huzûr. Fî 15 Ra sene 1242